[A:112b]brtson rnams kyis sha chang sogs mang du longs spyad na dran shes nyams pa sogs su mi 'gyur yang skye bo gzhan gyis sdom brtson rnams kyi spyod pa mi 'os pa 'di ltar bya ba snyam pa'i log lta'i sdig par 'gyur du dogs nas rje btsun gong ma rnams kyis tshogs 'khor lugs gnyis gsungs pa dang / sha chang sogs la brten pa'i tshogs 'khor byed na'ang sdom brtson rnams kyi lce la bdud rtsi myang ba tsam bya zhes gsungs pa'i rjes su 'brang nas thar 'dod rnams la blang dor gyi gnas tshul bzhin ston pa'i bshes gnyen dam pa la rang nyid phrag dog dang chags sdang sogs kyi nyon mongs pas kun nas blangs te skur 'debs sogs kyi sdang sems 'chang ba rnams kyi snying la ci zhig zhugs/ yang de nyid du/ tshogs kyi 'khor lo'i skabs su sha chang bkag pa la legs par brtags na rtsa ltung du mi 'gyur ba med de/ sngon gyi bla ma dam pa brnyas shing thugs dkrugs pas dang po 'byung ngo / /sngags kyi bcas pa la ral chos byas pas gnyis pa'o/ /'di bsten pa'i sngags pa kun la sdang bas gsum pa'o zhes sogs ltung ba bcu bzhi'i bar byung bar 'dren par byed do/ /'di dag kyang skye bo thams cad kyi rang nyid kho na mchog tu bzung nas gzhan thams cad dam tshig nyams pa sogs kyi sgo nas skyon can kho nar mthong ba zhig dgos pa'i 'dod pa khong 'tshangs kyi rtags su snang bas 'di'i rigs la dgag bsgrub bya bar ga la lang / 'on kyang de ltar smra ba po rang nyid la nyan thos kyi bslab pa la ltos na dge 'dun lhag ma'i ltung ba dang / rdo rje theg pa la ltos te rtsa ltung bzhi pa byung bar gsal