[A:13a]lta ba bzhin khrid pa'i tshe kho na dang sbyor rgyu min pas so zhes gsungs/ gnyis pa la/ 'o na de gnyis gang yang ma yin pa'i rjes 'dzin khyod la yod dam med snyam na/ sems bskyed chen mo byas pa'i phyi nyin de rjes 'dzin gyi phyag len byed pa de sngags kyi thar pa cha mthun/ de nas sngags lam du 'jug pa ni rjes 'dzin dngos te slob ma sta gon yin cing / chos rje pa yan gyis kyang spyi rgyud kyi slob ma rjes 'dzin gyi dngos gzhi slob ma sta gon nyid la dgongs par gsal te/ nyer lnga las lhag pa rjes su mi bzung ba'i shes byed du/ de bas lhag pa'i slob ma la/ /cho ga yongs su rdzogs pa ni/ /mtshan mo gcig la tshar mi nus/ /zhes gsungs pa'i phyir/ de dngos gzhi la dgongs pa min te dngos gzhi nyin mo byas pas cho ga nyams par mi 'gyur ba'i phyir dang / sta gon gcig gis chog pa'i dbang mang po pa dag sngon 'gro dang rjes thun mong bas bsdus pas na cho ga yongs su rdzogs pa gcig tu 'jog pas de lta bu mtshan thog thag slob ma nyung shas la byas kyang mi tshar ba'i phyir/ slob ma sta gon la mi mtshungs ste slob ma sta gon gyi cho ga'i mgo nyi ma nub pa nas bzung sang nyi ma ma shar gong du zin pa dgos pa'i phyir te/ de phyir khyed rnams theg chen du/ /sang ni rab tu skye bar 'gyur/ /zhes gsungs dgos pa dang / rmi lam brtag dgos pas so/ /des na snang gsum gyi khrid zin pa dag la spyi rgyud nas bshad pa'i rjes 'dzin mi dgos pa dang / las dang po pa gzhan la dgos pa'i khyad par yod/ de'i tshe so skye'i rdo rje slob dpon gyis nyer lnga las lhag pa