[A:29a]rgyud kyi dbang la grangs nges yod pa'i rgyu mtshan du/ rnam snang mngon byang las/ slob ma dad cing rigs btsun pa/ /de bzhin dkon mchog gsum la dad/ /zab mo yi ni blo dang ldan/ /spro ba che zhing tshul khrims ldan/ /bzod dang ldan zhing ser sna med/
/dpa' la yid rab brtan pa ni/ /bcu 'am brgyad dam bdun nam lnga/ /gcig gnyis bzhi las lhag kyang rung / /dpyad mi dgos par bzung bar bya/ /zhes pa dang / de dang 'brel chags su/ 'di skad ces/ gsang ba'i bdag po/ gang dag gis sngon theg pa chen po gsang sngags spyad pa'i tshul sgo mtha' yas pa sgrub pa la goms par byas pa de dag ni rdo rje sems dpa' yin te/ de rnams nyid kyi don gyi phyir grangs kyi tshad 'di byas so zhes pa rnams la dgongs nas/ spyod pa'i rgyud kyi dbang bskur la/ /slob ma kha 'chams kha yar gyi/ /nges pa med mod grangs med min/ /bcu las lhag pa bkag phyir ro/ /zhes gsungs pa dang / yang rgyud de nyid las/ 'on kyang slob dpon snying rje chen po dang ldan pas sems can gyi khams ma lus pa yid dam 'cha' ba kho nar bya ste/ des byang chub kyi sems kyi rgyur 'gyur bar bya ba'i phyir sems can tshad med pa rnams yongs su bzung bar bya'o zhes gsungs pa la dgongs nas/ de lta na yang rjes bzung gi /slob ma grangs la nges pa med/ /slob dpon snying rje chen po yis/ /tshad med bzung zhes gsungs phyir ro/ /zhes gsungs nas/ spyod rgyud kyi slob ma rjes 'dzin la grangs nges med par bzhed pa rgyab 'gal du song ngo / /bshad