[A:༡༠༦]དཔོན་རྣམས་ཀྱི་ནང་ནས་མངོན་པར་མཐོ་བ་ཡིན་ནོ༎
༈ དེ་ཡང་ཚལ་པ་ནི་ཞང་འགྲོ་བའི་མགོན་པོའི་རྣམ་པར་དཀར་བའི་འཕྲིན་ལས་ཀྱི་གདུགས་དཀར་པོ་དབྱིག་འཛིན་གྱི་ཁྱོན་ཀུན་ཁྱབ་པ་ལས་བརྒྱུད་དེ་ཁྲི་དཔོན་དུ་གྱུར་པ་ཡིན་པས། ལྷ་དབང་བརྒྱ་བྱིན་གྱི་སྤྲུལ་པར་གྲགས་པ་ཉེ་གནས་དར་མ་གཞོན་ནུས། འགྲོ་མགོན་རིན་པོ་ཆེའི་ཐུགས་སྲས་མཛད་དེ། གུང་ཐང་གི་གཙུག་ལག་ཁང་བརྩིག་པའི་ཞབས་ཏོག་ཕུན་སུམ་ཚོགས་པ་བསྒྲུབས། འགྲོ་མགོན་གཤེགས་ཁར་སྡེ་གཙུག་ལག་ཁང་གཉིས་ཀྱི་བདག་པོར་བསྐོར་ཏེ། ཕྱིའི་ཁྱམས་སྨད་དང་མགོན་ཁང་། ནང་དུ་གདུང་རྟེན་བཀྲ་ཤིས་འོད་འབར་དང་། སྐུ་འབུམ་ཆེན་མོའི་འཕྲོ་སོགས་གྲུབ་པར་མཛད། དེའི་རུས་དབོན་འབྱུང་གནས་བརྩོན་འགྲུས་ཀྱིས་དཔོན་གྱི་གོ་ས་བཟུང་ནས་ལུགས་ཟུང་གི་བྱ་བ་མི་དམན་པ་འགའ་ཞིག་བྱས་ཤིང་། དེའི་དབོ་ན་ཡེ་ཤེས་འབྱུང་གནས་ཀྱིས་སྲིང་མོ་བཞི་བུ་བརྒྱད་དུ་གྲགས་པའི་སྐྱིད་སྨད་ཀྱི་ཡུལ་གྲོང་མང་པོ་མངའ་འོག་ཏུ་ཆུག
དེ་རྗེས་དཔོན་སངས་རྒྱས་དངོས་གྲུབ་ནི་གནམ་གྱི་མཐོངས་ནས་མི་ཡུལ་དུ་བབས་པས། མགར་ཚེ་ནམ་ཚ་འབྲུག་དེ་ནས་མགར་བླ་མ་མཁྱེན་ཆེན་པོ། མགར་སྟོང་མེས་ཁྲི་ཆགས། དེའི་སྲས་མགར་སྟོང་བཙན་ཡུལ་བཟུང་གིས་ཆོས་རྒྱལ་སྲོང་བཙན་སྒམ་པོའི་བློན་པོ་མཛད། ལུགས་གཉིས་ཀྱི་མཛད་པས་རྗེའི་ཞབས་ཏོག་དང་བོད་འབངས་ལ་བཀའ་དྲིན་ཆེ། དེའི་སྲས་བཙན་པོ་ཡོན་ཏན་རྒྱལ་བཟུང་། དེ་ནས་རིམ་བཞིན་ལྷ་གཅིག་སྙན་ལྡེམ་བུ། ཁྲི་ཟངས་དུམ་བུ། ཁྲི་གཉེར་ཁྲི་ལྕགས། དེའི་སྲས་སྟོང་མེས་ཁྲིས་སྣང་། ཁྲི་སྟོ་རོ་སྟག་གཟུང་། བློན་ཆེན་ཆས་པ་སྒོ་དྲུག་དེའི་སྲས་རྨུ་བཟའ་དང་འཕགས་གཟིགས། དེ་ནས་རིམ་བཞིན་མགར་ཐོག་ཡང་རྒྱལ། རྒྱལ་ལེ། མགར་རྒྱལ་བ་འབྱུང་གནས། འདི་དང་ཞང་རིན་པོ་ཆེ་མཆོད་ཡོན་དུ་གྱུར་ཏེ། སྲས་ཕུན་སུམ་ཚོགས་པ་འབྱུང་བའི་ལུང་བསྟན་དང་མཐུན་པར་དཔོན་སངས་རྒྱས་དངོས་གྲུབ་འཁྲུངས་པ་དཔོན་