[A:༡༠༥]ཨེ་མ་རྩོད་དུས་གསེར་འཁོར་ཅན༎
ས་ལ་རྒྱུ་བའི་གནམ་གྱི་སྲས༎
གང་གི་ལུང་བཞིན་བོད་འབངས་གཙུག།
བདེ་འབྱུང་རལ་པའི་ཟླ་ཚེས་ལྟར༎
མཛེས་བྱེད་རྒྱན་དུ་སྤུད་པའི་དཔྱིད༎
བསྟན་པའི་བདག་པོ་ས་སྐྱ་པའི༎
གདུང་རབས་ཧ་ལའི་ཀ་ལ་ཤ།
བློ་གསལ་བདེ་འབྱུང་མགྲིན་པར་མཛེས༎
དེ་ཡང་མོན་གོར་རྒྱལ་པོས་འབྲི་གུང་པ། སེ་ཆེན་རྒྱལ་པོས་ཚལ་པ། ཧུ་ལ་ཧུས་ཕག་མོ་གྲུ་པ་རྣམས་སོ་སོར་མཆོད་གནས་སུ་བཟུང་སྟེ། བོད་རྣམས་རྒྱལ་པོ་སོ་སོས་རིས་སུ་བཅད་དེ་བདག་པོ་མཛད་པ་རྣམས་མཆོད་གནས་སོ་སོར་སྦྱར་བའི་མོན་ལུག་མགོ་སྟེང་ཚུན་ཆད། གཉལ་སྟོད་སྨད། གྲུ་ཤུལ། ལོ་རོ་དཀར་ནག་བྱར་པོ། ཨེ་ཆེ་བའི་ནང་ནས་ཨེ་ཆུང་། ཐང་པོ་ཆེ། འཕྱོང་རྒྱས། འཕྱོས། མོན་མཁར། མཁར་ལྟག་དོ་བོ། སྲེགས་ལྟེ། འོན་སྣ། ནམ་ཞལ་ལྔ། བསམ་ཡས་ཤར་སྒོ་གདོང་མན་ཆད་དང་། ལྷོ་བྲག་ཤར་ནས། མཆོད་སྡེ། བ་ཞི་བོད་འབྲོག་གཉིས། མངའ་རིས་ནས་ཀོ་རོན་མདོ་ཡན་ཆད། སྤུ་རིག་ལ་རྩ་མན་ཆད་རྣམས་རྒྱལ་པོ་ཧུ་ལ་ཧུར་གཏོགས་པའི་དོན་གྱི་ཕག་མོ་གྲུ་པའི་འོག་ཏུ་ཡོད་པ་དཔེར་མཚོན་ཏེ་འབྲི་གུང་དང་ཚལ་པ་རྣམས་ལ་ཡང་དེ་དང་དོད་མཚུངས་པ་ཡོད་པའི་དབང་གིས། གཡའ་བཟང་བ་ཁྲི་བསྐོར་གྱི་ཁ་གྲངས་སུ་བགྲངས་ཀྱང་དོན་དུ་ཕག་མོ་གྲུ་པའི་འོག་ཏུ་གནས་པ་ལྟར། སྣ་དཀར་རྩེ་པ་འབྲི་གུང་པའི་འོག་དང་། དེས་མཚོན་ཁྲི་དཔོན་གཞན་རྣམས་ཕག་འབྲི་ཚལ་གསུམ་ལ་ཆོས་སྲིད་གཉིས་ཀའི་སྒོ་ནས་འགྲན་པར་མི་ནུས་པས་འདི་གསུམ་ཁྲི་