[A:༩]འདྲེན་བྱེད་ཀྱི་དགའ་སྟོན་གསར་པ་བསྐྲུན་ཏེ། རྡོ་རྗེ་ཐེག་པའི་བགོ་སྐལ་ཀ་ལཱ་པའི་གྲོང་ཁྱེར་གྱི་སྐྱེ་རྒུར་འགྱེད་པའི་མུ་མཐའ་བྲལ་བའི་མཛད་པ་ནས་བཟུང་འཇིགས་པ་མེད་པའི་གདོང་ལྔའི་ཁྲི་ལ་བགྲོད་བྱེད་རྩིབས་སྟོང་འཁོར་ལོའི་རི་མོ་མཆོག་ཏུ་བཀྲ་བའི་ཆོས་རྒྱལ་རིགས་ལྡན་སུམ་ཅུ་རྩ་གསུམ་དུ་བྱོན་པ་མཐའ་དག་གིས་ཕྱི་ནང་གཞན་གསུམ་སྦྱོར་བའི་གསང་ཆེན་ནཱ་དའི་སྒྲ་དབྱངས་ཀྱི་ནོར་བུའི་འཕྱང་འཕྲུལ་ལས་ལྡན་གྱི་རྣ་བར་སྤུད་པར་མཛད་པའི་ཐ་མ། དྲག་པོའི་འཁོར་ལོ་ཅན་གྱིས་དགུང་ལོ་དགུ་བཅུ་རྩ་བརྒྱད་པར་ཀླ་ཀློའི་དཔུང་ཚོགས་མཐའ་དག་མིང་གི་ལྷག་མར་བྱས་ནས་སྔ་ན་མེད་པས་ས་ཆེན་པོའི་ཁོར་ཡུག་ཀུན་ཏུ་ཁྱབ་པར་མཛད་དོ། ། དེ་ཡང་རིགས་ལྡན་དྲག་པོ་དགུང་ལོ་ལྔ་བཅུའི་སྟེང་དུ་ཀླ་ཀློ་བཅོམ་པར་བཞེད་པ་ལྟར་ན། ཀླ་ཀློའི་གནས་ཚད་སྟོང་དང་བརྒྱད་བརྒྱར་བཤད་པ་ལས་ལོ་གྲངས་བཞི་བཅུ་རྩ་བདུན་ཙམ་མི་འགྲིག་པའི་སྐྱོན་ཡོད་ཅིང་། དེ་དག་རགས་རྩིས་སུ་འཆད་ན་ཞིབ་རྩིས་ནི་འབྱུང་བའི་སྐབས་མེད་པས་གཟུར་གནས་ཀྱི་ཤེས་ལྡན་རྣམས་སོམས་ཤིག་དེ་ལྟར་ཤམ་བྷ་ལས་མཚོན་ཏེ། ཨོ་རྒྱན། བལ་ཡུལ། རྒྱ་ཧོར་སོགས་སུ་བསྟན་པ་བྱུང་ཚུལ་ནི་མཐའ་ཡས་ཀྱང་མང་གིས་དོགས་པས་མ་སྤྲོས་སོ། །
༈ སྐབས་སུ་བབས་པ་རང་ཅག་གངས་རིས་བསྐོར་བའི་ལྗོངས་འདིར་རྒྱལ་བའི་འཕྲིན་ལས་ཀྱི་འཇུག་པ་ཤར་ཚུལ་ནི། དེ་ཡང་ཟླ་གཞོན་ལན་བརྒྱར་བཞུས་པའི་ཁུ་བས་བྱུགས་པའི་མན་ཤེལ་གྱི་ལྷུན་པོའི་འཕྲེང་བ་ཚར་དུ་དངར་བ་ལྟ་བུའི་གངས་རིའི་འདབ་མས་ཁོར་མོ་ཡུག་ཏུ་འཁྲིགས་པའི་ཡུལ་ལྗོངས་འདིར་མིའི་འགྲོ་བ་ཆགས་ཚུལ་ལ། མཁས་པ་རྣམས་ཀྱི་བཞེད་ཚུལ་མཐའ་ཀླས་ཤིང་། འགའ་ཞིག་ནི་རང་ཉིད་ཀྱི་ལུགས་ཁོ་ན་ལ་ཞེན་པའི་ལུང་རིགས་ཀྱི་དཔྱད་པ་མེད་པར་ལུགས་གཞན་དག་རྣམས་ཚད་ལྡན་མ་ཡིན་པ་ཁོ་ནར་སྨྲ་བའི་གཏམ་གྱི་འབྲུག་སྒྲས། ཆོས་སྤོང་གི་རྨ་བྱ་རང་དབང་