[A:༡༠]མེད་པར་དགའ་བའི་ལས་ཀྱི་སྒྲིབ་པའི་སྒྲོ་གཤོག་ཕྱོགས་བཅུར་སྐྱོང་བ་འགའ་མཆིས་ནའང་། རིས་སུ་མ་ཆད་པའི་གསུང་རབ་ཀྱི་རྒྱ་མཚོ་ཆེན་པོའི་འཇིང་ལས་རྣམ་དཔྱོད་གྲུ་གཟིངས་ཀྱིས་རང་དབང་དུ་སྤྱོད་པ་གཞོན་ནུ་དཔལ་བའི་གསུང་ལས། བོད་ཀྱི་ཡུལ་འདི་ཡང་རྒྱ་གར་དང་འདྲ་བར། ཡུལ་དང་མི་ལ་སོགས་པ་གནས་པའི་བསྐལ་པ་ནས་བྱུང་བར་བྱས་ན་ཡང་། ལུང་དང་རིགས་པའི་གནོད་པ་མེད་ཅིང་ཞེས་སྤྱི་ཁྱབ་ཏུ་གསུངས་ནས། ལུགས་གཞན་ཡང་འདྲེན་པར་མཛད་པའི་གུང་འགྲིག་མི་འགྲིག་གི་བརྗོད་བྱ་ཙམ་ལས་མཐའ་གཅིག་ཏུ་གསལ་བར་མ་གསུངས་ལ། ལྷ་ལས་ཕུལ་བྱུང་གི་བསྟོད་འགྲེལ་ལས་བཤད་པའི་རྒྱལ་པོ་རུ་པ་ཏི་དཔུང་བཅས། རི་ཁ་བ་ཅན་གྱི་ཁྲོད་དུ་ཞུགས་པ་ལས་འཕེལ་བའི་རིགས་ཀྱང་ཡོད་སྲིད། གཙོ་བོ་ནི་ཕྱག་ན་པདྨའི་ཐུགས་རྗེའི་འཕྲིན་ལས་ཀྱི་འོད་ཟེར་འགོག་པ་མེད་པར་ཤར་བས། གངས་ཁྲོད་ཀྱི་འགྲོ་བའི་པད་ཚལ་རྣམ་པར་རྒྱས་པ་ཞིག་སྟེ། དེ་དག་གི་ཚུལ་གནས་ལྔ་ཡོངས་སུ་རྫོགས་པའི་པཎྚི་ཏ་ཆེན་པོ་དཱི་པཾ་ཀ་ར་ཤྲཱི་ཛྙཱ་ནས་ཀ་བ་ཤིང་ལོ་ཅན་གྱི་བྱང་ངོས་ནས་བཞེས་པའི་བཀའ་འཁོལ་མ་དང་། མ་ཎི་བཀའ་འབུམ་སོགས་གངས་ཅན་གྱི་ལྗོངས་ན་དར་རོ་ཅོག་གི་ཐུགས་རྗེ་ཆེན་པོའི་ཆོས་སྐོར་དུ་མ་ཞིག་དགོངས་པའི་ཁོག་གཅིག་པ་ལས། སྤྲེའུ་དང་བྲག་སྲིན་མོ་ལྷན་ཅིག་ཏུ་འདུས་པའི་ཕྲུག་གུ་གདོང་དམར་ཤ་ཟན་གྱི་རིགས་སུ་བཤད་པ་ལྟར། རྒྱལ་བ་ཉི་མའི་གཉེན་གྱི་ཚད་མེད་པའི་ཐུགས་རྗེའི་མངལ་ཁུར་ལས་འཐོན་པའི་གསུང་གི་སྣང་བ་སྩལ་བ་ལ་བརྟེན་ནས། བོད་ཆེན་པོའི་རྒྱལ་ཁམས་སུ་འཕགས་པ་རིགས་གསུམ་གྱི་མགོན་པོས་དྲི་མ་མེད་པའི་འདྲེན་བྱེད་ཀྱིས་གཟིགས་པ་ན། སྟོད་མངའ་རིས་ཀྱི་ཆ་ནི་གླང་པོ་ཆེ་དང་རི་དྭགས་ཀྱི་ཡུལ། བར་དབུས་གཙང་གི་ཆ་ནི་རི་དྭགས་དང་སྤྲེའུའི་ཡུལ། སྨད་མདོ་ཁམས་ཀྱི་ཆ་ནི་སྤྲེའུ་དང་བྲག་སྲིན་གྱི་ཡུལ། དེ་ཡང་སྟོད་གཡའ་རི་དང་གངས་རི། བར་བྲག་དང་སྤང་ལྗོངས། སྨད་རྩི་ཤིང་དང་ནགས་ཚལ་གྱི་ཡལ་