[A:༡༢༣]། བོད་ཁམས་ཡོངས་ཀྱི་བདག་པོ་འོང་། ། ཞེས་ལུང་བསྟན་པ། འཇམ་དབྱངས་གོང་མ་རྒྱལ་པོའི་ཕོ་བྲང་ཚུན་གྱི་མཆོག་དམན་གྱི་སྐྱེ་བོ་མཐའ་དག་གི་མིག་དང་རྣ་བའི་སྤྱོད་ཡུལ་དུ་གྱུར་པ་དེ་ལྟར་ཡིན་ལ། འདིའི་ཇོ་མོ་སྐལ་ལྡན་མ་ལ་སྲས་དཔལ་གྱི་སངྒེ། གཉན་ཐོག་ཨ་ཁྲོམ། སྟག་ཚབ་གསུམ་ལས། འབྲིང་པོ་གཉན་ཐོག་ཨ་ཁྲོམ་གྱི་སྲས་གཉན་པོ་ཉ་མོག་ཁྲི། དེའི་སྲས་རླངས་སྟོན་བྱ་ཞུ་ནག་པོ། དེའི་སྲས་ཨ་སེང་། དེའི་སྲས་ཨ་སེར། དེའི་སྲས་སྐྱབས་བདུན་དཔལ་དང་བརྒྱད། བཙན་དང་དགུ་ཞེས་པའི་ཆེ་བ་ཡོན་ཆེན་རྒྱལ་བ་སྐྱབས་ཡིན་ལ། དེ་ཡང་རླངས་སྟོད་ཐོ་ཡི་སྤྱི་དཔོན་མཛད། མགོ་རུམ་སེང་གེས་རྒྱ་བཅོམ། རྩེ་འཐོན་གྱིས་དྲག་པོ་སྤུན་བཞི་བཏུལ། ལྡོང་སྲས་ཀྱིས་འདན་ཡུལ་དབང་དུ་བསྡུས་པ་སོགས་འཇིག་རྟེན་མི་ཆོས་ནས་མངོན་པར་མཐོ་བ་ཤིན་ཏུ་མང་ཞིང་། དམ་པའི་ལྷ་ཆོས་ཀྱི་སྒོ་ནས། བྱང་ཆུབ་འདྲེ་འཁོལ་ནི་གོང་དུ་སྨོས་ཟིན་པ་དང་། དེའི་སྲས་གསུམ་གྱིས་དཔག་པར་དཀའ་བའི་སྤྲུལ་སྒྱུར་མཛད་པ་དང་། རླངས་ཁམས་པ་གོ་ཆས་རབ་ཏུ་བྱུང་བའི་སད་མི་མི་བདུན་གྱི་བར་མར་གྲགས། རླངས་དཔལ་གྱི་སེངྒེས་སློབ་དཔོན་ཆེན་པོའི་ཐུགས་སྲས་མཛད་དེ་གྲུབ་པ་བརྙེས། ཡེ་ཤེས་རྡོ་རྗེས་ཉི་མ་ལྟོང་ལ་མནན། ཡེ་ཤེས་སེངྒེས་དཔལ་ཐང་དུ་ཇག་པ་བཏུལ། དཔལ་གྱི་འབྱུང་གནས་ཀྱིས་ལྷ་འདྲེ་དམ་ལ་བཏགས། དར་མ་སེངྒེས་དུར་ཁྲོད་བསིལ་བ་ཚལ་དུ་བྱོན། དཔལ་གྱི་རྡོ་རྗེས་ཉི་ཟེར་ལ་ཆོས་གོས་བཀལ་བ་སོགས་གྲུབ་པ་བརྙེས་པའི་མཐུ་སྟོབས་དང་རྫུ་འཕྲུལ་དཔག་པར་དཀའ་བ་ཤ་སྟག་ཏུ་བྱོན་པ་ཡིན་ནོ༎ སྨྲས་པ།
འཆི་བ་མེད་པའི་ལམ་ལས་ལེགས་འོངས་ལྷ་རིགས་རླངས་ཀྱི་པད་དཀར་ཚལ༎