[A:༡༥༠]ནས་གནང་ཞིང་། ཟུར་འཆད་སློན་དཔོན་རྣམས་ལ་བཀའི་འཁོར་ལོས་ཁྱབ་པ་དང་། གསེར་གྱི་བཀའ་འགྱུར་བཞེང་བ་སོགས་ལུགས་ཟུང་གི་མཛད་པ་མཐའ་དག་གོང་མ་ན་རིམ་གྱི་སྲོལ་བཟང་པོ་མ་ཉམས་པར་བཟུང་། ཡར་རྒྱབ་ནས་ཆེ་ས་རྩེས་ཐང་དུ་གདན་དྲངས། ཞལ་ངོ་ནང་མཚམས་ཀྱི་འཁོན་ཞི་ནས་ཐུགས་ཡིད་གཅིག་ཏུ་འདྲེས། བྱང་ཕྱོགས་ཀྱི་བསོ་ཁ་བསྲུང་བར་འུ་ཡུག་གླིང་དཀར་གྱི་རྫོང་བརྩིགས། རིན་སྤུང་ནོར་བུ་བཟང་པོ། འཕྱོང་རྒྱས་པ་ཧོར་དཀོན་ཅོག་རིན་ཅེན་ནི་ཆོས་རྒྱལ་ཆེན་པོའི་ཞབས་ལ་གཏུགས་ཀྱང་གོང་མ་འདིའི་དུས་སུ་ཁྲིམས་ཀྱི་ཁ་ལོ་སྒྱུར་བའི་བློན་པོ་མཛད།
གཅུང་ཀུན་དགའ་ལེགས་པས་གསུང་རབ་ལ་སྦྱངས་པ་མ་སྨད་པ་མཛད་དེ་རྩེས་ཐང་གི་གདན་སར་ཕེབས། རིན་སྤུངས་ནས་བདག་མོ་ཁབ་ཏུ་བཞེས་པར་སྲས་རིན་ཅེན་རྡོ་རྗེ་དབང་གི་རྒྱལ་པོ་འཁྲུངས། འཇམ་དབྱངས་གོང་མ་ཆེན་ཧང་རྒྱལ་པོས་དབང་གི་འཇའ་ས་གནང་། འདི་ཉིད་རྟོགས་པའི་ཡོན་ཏན་ཕུལ་དུ་བྱུང་བའི་གྲུབ་པའི་དབང་ཕྱུག་ཆེན་པོ་ཞིག་ཡིན་པར་འདུག་ནའང་གནས་སྐབས་སུ་སྐྱེ་བོ་རྣམས་ཀྱི་སྣང་ངོར་མཛད་སྒོ་ལེགས་རྒྱུ་མེད་ཙམ་ཡོད་འདུག་པར་དཔགས། གཙང་གི་གཞིས་བསྐོར་ལ་ཕེབས་དུས་རིན་སྤུངས་ནོར་བཟང་པས་གུས་འདུད་བླ་ན་མེད་པ་མཛད་ཀྱང་གནང་སྒོའི་ཁོག་ལ་མ་མགུ་སྐད། དེ་ནས་གོང་མ་ཀ་བཞི་པ་སྐུ་མཆེད་ཀྱིས་གང་ཞུས་ལ་གསན་པས། ཡབ་ཡུམ་ནང་མཚམས་སུ་སེལ་ཆེན་པོ་ཞུགས་ཏེ། ཡར་གོང་བྱ་པ་བསམ་སྡེ་པ་སོགས་བདག་མོ་ཕྱོགས་དང་། སྣེའུ་འོལ་དགའ་རྣམས་གོང་མའི་ཕྱོགས་སུ་ཆད་ནས་དུས་མི་བདེ་བ་མང་དུ་བྱུང་། འོན་ཀྱང་འཕྱོང་རྒྱས་པ་རྡོ་རྗེ་ཚེ་བརྟན་ཕན་ཚུན་གཉིས་ཀའི་ཕྱོགས་སུ་མ་ལྷུངས་པས་སྡེ་གཟར་བཟླུམས་ཤིང་། ཞལ་ངོ་ནང་མཚམས་ཀྱི་ལེགས་སྤེལ་མཛད་པས་སྡེ་སྲིད་ཀྱི་ཞབས་ཏོག་ཏུ་འགྱུར་བ་བྱུང་། དེ་ནས་ཡུམ་གཤེགས་རྗེས་རིན་སྤུངས་པ་མཚོ་སྐྱེས་རྡོ་རྗེས་མཁར་ཐོག་བཟུང་། དེ་ཡང་དེབ་