[A:༡༥༢]རྣམས་གཤེགས་པས་ལྷ་རིགས་རླངས་ཀྱི་གདུང་འཛིན་པ་སྤྱན་སྔ་ཉིད་མ་གཏོགས་མེད་པར་བརྟེན། ཇི་ལྟར་གྲོང་ཁྱེར་སེར་སྐྱའི་མི་གཙང་ལུད། ། དེ་ནི་བུ་རམ་ཤིང་པའི་ཞིང་ལ་ཕན། ། དེ་བཞིན་བྱང་ཆུབ་སེམས་དཔའི་ཉོན་མོངས་ལུད༎ ་དེ་ནི་སངས་རྒྱས་ཆོས་རྣམས་བསྐྱེད་ལ་ཕན། ། ཞེས་པའི་དོན་ལྟར། བོད་ཁ་བ་ཅན་འདིར་ཀུན་མཁྱེན་བུ་རམ་ཤིང་པའི་བསྟན་པ་རིན་པོ་ཆེ་དང་། སྐྱེ་རྒུ་རྣམས་ཀྱི་ཕན་བདེ་ནི་གནམ་བསྐོས་ཀྱི་རྒྱལ་པོ་ཕག་མོ་གྲུ་པའི་སྡེ་སྲིད་ལ་རག་ལུས་པས། གོང་དུ་སྨོས་པའི་བློན་པོ་རྣམས་ཀྱིས་གོང་མ་སྤྱན་སྔ་རིན་པོ་ཆེར་ནན་གྱིས་ཞུས་ཏེ། རྫོང་ཁ་པའི་སྲས་མོ་ཞིག་བདག་མོར་ཕུལ། ཡབ་མེས་ཀྱི་ལུགས་སྲོལ་བཟང་པོ་རྣམས་དཀར་ཕྱོགས་ཀྱི་ཟླ་ཚེས་ལྟ་བུར་ཆེས་ཆེར་གསལ་བར་མཛད། སྲས་ངག་དབང་བཀྲ་ཤིས་གྲགས་པ་སྐུ་བལྟམས་ནས་རིང་པོར་མ་ལོན་པར་སྤྱན་སྔ་ཞི་བར་གཤེགས་ཁར་སྲས་སྐུ་ཧ་ཅང་ཕྲ་བས་དེ་ལ་ཐུགས་ཆགས་པའི་ཚུལ་གྱིས་སྐུ་ངལ་བ་ཆེན་པོར་གྱུར་སྐབས། སྤྱན་སྔ་ཆོས་ཀྱི་གྲགས་པས་གདུང་བརྒྱུད་རིན་པོ་ཆེ་ནར་མ་སོན་པའི་རིང་ཁོང་རང་གིས་ཐེལ་གྱི་སྤྱན་སྔའི་ཁུར་བཞེས་དང་། ཐེལ་རྩེས་ཐང་གི་ཆེན་པོ་གྲོས་དབང་པ་བློན་པོ་རྣམས་དང་བཅས་པར་གནང་བཀོད་བཀའ་ནན་སོགས་ཀྱིས་ཁྱབ་པའི་སྡེ་སྲིད་ཀྱི་ལར་རྒྱ་མི་འཕྱུག་པའི་ཞལ་ལེན་མཛད། དེ་ཡང་དཔོན་ཚབ་ཐེལ་གཏོང་བྱེད་པར་རིན་སྤུངས་མཚོ་སྐྱེས་རྡོ་རྗེས། བློན་པོ་གཞན་རྣམས་ལ་གྲོས་མེད་པར་འགའ་ཞིག་གི་འདོད་པ་ལྟར་མཛད་པས། སྡེ་དཔོན་གཞན་རྣམས་མ་འདོད་པའི་དབང་གིས་སྡེ་གཟར་ལངས། འོན་ཀྱང་འཕྱོང་རྒྱས་ནས་སྡེ་སྲིད་ཀྱི་ལར་རྒྱ་ལ་དགོངས་ཏེ་ཐུགས་ཁོག་ཆེ་བར་མཛད་པས་ཡོ་འཁྱོམས་ཆེར་མ་བྱུང་། དེ་ནས་འཇམ་དབྱངས་གོང་མས་སྤྱན་སྔ་རིན་པོ་ཆེར་དབང་གི་འཇའ་ས་གནང་ཡང་སྤྱན་སྔ་ཞིང་བརྗེས་པས་གནང་སྦྱིན་རྣམས་ཕྱག་མཛོད་དུ་བཞག་ནས་གསེར་ཡིག་པ་ཕྱིར་ལོག