[A:༡༦༣]མེད་སེངྒེའི་རྒྱུད་ཀྱི་ང་རོས་ཐོག་དྲངས་པའི་ཚིག་སྦྱོར་ཕུན་སུམ་ཚོགས་པའི་བསྟན་བཅོས་ཀྱི་རྩོམ་པ་མང་དུ་མཛད། ལུགས་གཉིས་ལ་རྣམ་དཔྱོད་ཀྱི་སྒོ་འཕར་མཆོག་ཏུ་ཡངས། འོན་ཀྱང་ཕག་ཚང་ཡོས་ལྟར་དཀྲུག་པའི་ལུང་བསྟན་ཐོག་ཏུ་བབ་པའི་མཚན་རྟགས་ཀྱིས་ཞིང་གཤག་པས་འབངས་གྱེན་ལོག་བྱས་སྐབས་སྲས་པདྨ་དཀར་པོ་བཀྲོངས་པའི་གཏམ་བྱུང་བ། རིན་ཅེན་སྤུངས་པར་དམེ་འཁྲུག་དར་བ་འབྱུང་། ། ཞེས་པའི་དུས་སུ་མངོན། སྐུ་ཚེའི་མཇུག་ཏུ་མངའ་ཐང་ཕལ་ཆེར་ཤོར། སྲས་ཟླ་བ་བཟང་པོའི་བརྒྱུད་དེང་སང་ཡང་སྣང་ངོ་༎ ༎
༈ གོང་མའི་བློན་པོ་ཧོར་གཞོན་ནུ་བཟང་པོ་ནི། ཟ་ཧོར་གྱི་རྒྱལ་རིགས་ཏེ། གྲོང་ཁྱེར་ཤིང་ཐབས་ཅན་ན་རྒྱལ་པོ་ཤིང་རྟ་བཅུ་པ་ཞེས་བྱ་བ་བྱུང་བའི་སྲས་ཆོས་རྒྱལ་མྱ་ངན་མེད་ཅེས་བྱ་བ་བདེན་ཚིག་གི་མཐུས་མཆོད་རྟེན་བྱེ་བ་བཞེངས་པ། དེའི་སྲས་རྒྱལ་པོ་ཛ་ཞེས་པ་སྨོན་ལམ་གྱི་མཐུས་རྡོ་རྗེ་སེམས་དཔའི་གླེགས་བམ་གྱི་ཆར་ཕོ་བྲང་གི་སྟེང་དུ་བབས་པས་མདོ་སྡེ་ཟ་མ་ཏོག་རླུང་གིས་ཁྱེར་ཏེ་ཕོ་བྲང་ཡོམ་བུ་གླ་སྒང་གི་སྟེང་དུ་བབས་པ་ལྷ་ཐོ་ཐོ་རི་སྙན་ཤལ་གྱི་གཉན་པོ་གསང་བར་བཏགས་ལ། དེའི་སྲས་ཟ་ཧོར་རྒྱལ་པོ་ཨིནྡྲ་བྷཱུ་ཏི་སྔགས་ལ་མོས་པས། པོ་ཏི་གཉིས་ཕྱག་ན་རྡོ་རྗེའི་བྱིན་རླབས་ཀྱིས་རྙེད་ཀྱང་བརྡ་མ་འཕྲོད་པས་གྲུབ་ཐོབ་ཀུ་ཀུ་རཱ་ཛ་སྤྱན་དྲངས་ཏེ་སྨིན་པར་མཛད། དེ་ལ་སྲས་མོ་གོ་མ་དེ་ཝ་དང་། སྲས་ཤ་ཀྲ་གཉིས་ཀྱིས་རིག་པ་འཛིན་པའི་ས་གྲུབ་ཅིང་། དེའི་སྲས་རྒྱལ་པོ་གཙུག་ལག་འཛིན་བྱ་བ་སློབ་དཔོན་ཆེན་པོའི་ཟབ་མོའི་ཆོས་དང་ལུང་གིས་དབུགས་དབྱུང་བ། དེ་ལ་སྲས་དྷརྨ་རཱ་ཛ། མཁན་ཆེན་ཞི་བ་འཚོ། ལྷ་ལྕམ་མན་དྷ་ར་བ་གསུམ་ལས། བར་པ་གནས་ལྔ་རིག་པའི་ཕ་རོལ་ཏུ་བྱོན་ཞིང་། གངས་ཅན་བསྟན་པའི་རྩ་ལག་མཛད། ཕྱི་མ་ཡེ་ཤེས་མཁའ་འགྲོ་ཀུན་གྱི་གཙོ་མོར་གྱུར། དང་པོས་རྒྱལ་སྲིད་བསྐྱངས་པའི་སྲས་དྷརྨ་པཱ་ལ། ཤཱཀྱ་དེ་ཝ། མ་ཧཱ་དེ་ཝ་གསུམ་བྱུང་ལ། དེ་ཡང་གངས་ཅན་གྱི་ལྗོངས་