[A:༡༧༦]གྲགས་པ་བརྩོན་འགྲུས། གཞོན་ནུ་འཕགས་གསུམ་ལས། ཆེ་བས་སྣར་ཐང་དུ་རབ་ཏུ་བྱུང་། ཆུང་བས་ཏི་རི་གྲགས་འོད་པའི་ཡིག་དཔོན་མཛད། བར་པ་ལ་སྲས་རྒྱལ་མཚན་ཡིག་རིས་མང་དུ་མཁྱེན། འདི་ཉིད་ཀྱིས་བརྩམས་པའི་བཀའ་པོཏ་ཡང་སྣང་། འདི་ཆོས་རྗེ་ཀརྨ་པ་དང་ཐུགས་འབྲེལ་ཆེ་བས། མཚུར་ཕུའི་བྱང་ཆུབ་ཆེན་པོ་བཞེང་བར་བྱོན་སྐབས། བཟོ་རྒྱུས་ལྡངས་ན་ཁོ་བོས་མདུན་གྱི་ནགས་རི་འདི་ཙམ་བློར་ཤོང་ཞུས་པས། སྤྲུལ་སྐུ་ནགས་རི་པར་གྲགས། འདིས་མ་གཅིག་ལྷ་སྨན་ཇོ་མོར་བླངས་པར་སྲས་དཔལ་ལྡན་བཟང་པོ། དཔལ་ལྡན་རིན་ཅེན། མ་ཟངས་དར་པོ་གསུམ་འཁྲུངས། ཉང་སྟོད་འདུལ་ཆུང་ཆུ་ནུབ་ཀྱི་ནང་ཚན། ལྷན་ཡུལ་སྔོན་མོ་ལུང་རིངས་སུ་བྱོན་པའི་ལམ་ཁར་ལྕགས་པའི་གདུང་བརྒྱུད་འཕགས་པ་རྒྱལ་ལ་དང་མཇལ་ཏེ་མིང་ཞུས་པས། གཅེན་གཉིས་ལ་འཕགས་པ་དཔལ་བཟང་དང་། འཕགས་པ་རིན་ཅེན་དུ་བཏགས།
འཕགས་པ་དཔལ་བཟང་གིས་དཔལ་ལྡན་ས་སྐྱ་པའི་ལས་ཚན་བཟུང་། གཏམ་ཡིག་རྩིས་གསུམ། མདའ་ཁ་དཔའ་རྩལ་དང་ལྡན་པའི་ཤར་དུང་ལྷོ་དུང་འདུལ་བའི་རྒན་པོར་ས་སྐྱ་ནས་བསྐོན་ཆ་དང་བཅྭ་ཚེ་གནང་། དེ་ནས་བཞི་ཐོག་ཉེ་གནས་ཀྱི་གོ་ས་བཟུང་། པ་ཤི་ད་ར་ཁ་ཆེ་ཤར་ཕྱོགས་གོང་མའི་དྲུང་དུ་བརྫངས་པས། འདྲི་མཚམས་གངས་དཀར་པོ་ཚུན་ཤེས་སུ་བཅུག་པའི་འཇའ་ས་གནང་། གོང་མ་སི་ཏུའི་དྲུང་དུ་བྱོན་པར། སློབ་དཔོན་ནམ་རྒྱལ། ཤེར་བཟང་། པ་ཤི་དཀོན་ཅོག་རྣམས་ཀྱིས་རིན་སྤུངས་སུ་བསྒར་ནས། གྲྭ་ཚོང་འདུས་སུ་བསྐྱལ་ཏེ་ངམ་གཅུར་བྱས་པ་ལས་གྲོལ་ཏེ་ཡར་བྱོན་སྐབས། ཧོར་རྒྱལ་པོས་ནང་ཆེན་གྱི་འཇའ་ས་གནང་། རྩེ་ཆེན་དང་ཕག་རི་རྣམ་རྒྱལ་གྱི་རྫོང་བརྩིགས། རྒྱལ་རྩེ། སྣ་བོ་རྫོང་གཉིས་ཉི་མ་གཅིག་ལ་འགྲམ་བཏིངས། ཁྱུང་རྩེ་སོགས་རྫོང་མང་དུ་བརྩིགས། རྩེ་ཆེན་གཙུག་ལག་ཁང་བཏབ།
བདག་ཆེན་འཕགས་པ་དཔལ་ལ་སྲས་མང་དུ་ཡོད་ཀྱང་། ཇོ་མོ་མ་