[A:༡༧༥]དཔལ་ལྡན་འབྲས་སྤུངས་ཀྱི་ཆོས་སྡེ་ཆེན་པོའི་མཇུག་ཆགས་རྣམས་མཛད། དཔོན་གྲགས་པས་ཚལ་པ་དཔོན་མོ་ཇོ་མོར་བླངས་པའི་སྲས། དྲུང་ཆེན་གྲགས་པ་དཔལ་བཟང་གིས་གོང་མ་གྲགས་འབྱུང་བའི་ཞབས་ལ་གཏུགས། སྟག་སྣའི་དམག་རེས་བྱེས་གཉེར་དང་། ཁྲིམས་ལས། གསོལ་དཔོན་སོགས་ལས་ཚན་རིམ་པར་མཛད། རྒྱལ་མཁར་རྩེའི་སྲས་མོ་སྐལ་བཟང་མ་ཇོ་མོར་བླངས་ཀྱང་། བར་སྐབས་སུ་རེ་དོགས་ཅི་རིགས་ལ་བརྟེན་རབ་ཏུ་བྱུང་། སླར་ཧོར་ཆས་སུ་བསྒྱུར་ནས་གོང་སས་དུ་དབེན་ཤྲིའི་ལས་ཀ་གནང་། བྱང་སྦྲ་ཐག་འཐེན་ཚད་ཀྱི་དཔོན་དུ་བསྐོས། རིན་སྤུངས་པ་ལ་མཛོ་རིར་ཇུས་ཉེས་ཆེན་པོ་བཏང་བས་དཔའ་གྲགས་ཆེ། དེའི་སྲས་དྲུང་ཆེན་དཔལ་འབྱོར་རྒྱལ་པོ། དབང་གྲགས་འབྱུང་བ་སྐུ་མཆེད་ཀྱིས་རྫོང་དཔོན་གྱི་ལས་ཀ་གནང། བསྟན་པ་སྤྱི་དང་ཁྱད་པར་རྒྱལ་བ་བཙོང་ཁ་པའི་བསྟན་པ་ལ་ཕུལ་དུ་བྱུང་བའི་བསྟི་སྟང་མཛད། མངའ་ཐང་ཡང་ཤིན་ཏུ་མཐོ་བས། འབྲི་གྲུང་རྡོ་ཐམ་མན། ཁ་རག་རྡོ་བུག་པ་ཅན་ཡན། ཡར་ཀླུངས་ཁྲ་འབྲུག་ཚུན་ཞེས་ལམ་ཡིག་མཛད་སྐད། འདི་ཉིད་ཀྱི་སྲས། ངག་དབང་བསོད་ནམས་རྒྱལ་པོ། ངག་དབང་བསོད་ནམས་ལྷུན་པོ། ངག་དབང་བསོད་ནམས་རྣམ་རྒྱལ་གསུམ་ལས། དང་པོ་ཆུང་ངུ་ལ་གྲོངས། ཕྱི་མ་གཉིས་ཀྱི་དུས་རིན་སྤུང་དོན་ཡོད་རྡོ་རྗེས་དཔུང་གི་སྦྱོར་བས་མངའ་ཐང་རྣམས་ཤོར་རོ༎ ༎
རྒྱལ་མཁར་རྩེ་པ་ནི། སྔོན་འདོད་ཁམས་སྟོད་དུ་དགྲ་རྒོད་ལྡང་བཙན་བྱ་བ། སྟག་ལྤགས་བརྒྱའི་ཐུལ་པ་གྱོན་པ། དྲེད་ལ་སྦར་འཛིན་བྱེད་པ། ཁྲོམ་གེ་སར་རྒྱལ་པོའི་མག་པ་བྱས་པའི་བུ་ཚ་བརྒྱུད། ཡོན་བདག་འབུམ་ཉེག་བྱ་བའི་སྲས་སློབ་དཔོན་ནམ་མཁའ་བྱང་ཆུབ་བྱ་བ་གསང་སྔགས་རྡོ་རྗེ་ཐེག་པའི་སྒོ་ནས་གྲུབ་པ་བརྙེས་པ་ཞིག་གི་སྲས་སློབ་དཔོན་ནམ་མཁའ་ལྷུན་གྲུབ། དེའི་སྲས་སློན་དཔོན་ནམ་མཁའ་བཟང་པོ། དེ་ལ་སྲས་བརྩོན་འགྲུས་རྡོ་རྗེ།