[A:༡༩༨]གངས་ལྡན་ར་བའི་ངོས་ལས་ཕྱི་རོལ་བརྒལ༎
མ་རིག་སྟུག་པོར་འཕྱན་བྱེད་དགྲ་སྡེའི་ལྷར༎
མངོན་པར་འཁོན་པའི་བདུད་རྩི་བོད་ཡུལ་ཟོང་༎
འཐུངས་པས་ཆོས་སྲིད་བདག་པོ་ས་སྐྱ་པ༎
སྟོབས་ལྡན་སྒྲ་གཅན་གཉིས་པ་ས་འདིར་སྣང་༎
རིན་ཅེན་བདུན་གྱི་འདོད་རྒུར་མངའ་སྒྱུར་བའི༎
ས་དབང་རྒྱལ་པོའི་གོ་སར་གནམ་གྱི་མཐོངས༎
སྒོ་འཕར་ཡངས་པའི་སྤོ་ནས་བུམ་བཟང་གིས༎
སྤྱི་བོར་དབང་བསྐུར་སྡེ་སྲིད་ཕག་མོ་གྲུ༎
ཨེ་མ་སྔོན་བྱོན་ས་སྤྱོད་ལྷ་རྣམས་ཀྱིས༎
བོད་འབངས་འདབ་བརྒྱ་བཞད་པའི་ཕན་བདེའི་འོད༎
སྤྲོས་ཚེ་ཉིན་བྱེད་བདག་གིས་ཅི་བྱ་ཞེས༎
གནོད་སྦྱིན་ཕྱོགས་ཀྱི་འཁྲིག་པའི་ཁྱིམ་དུ་བྲོས༎
ཁྲིམས་གཉིས་སྲབ་ཀྱིས་མ་གཅུན་རེངས་པའི་གཉར༎
དྲང་ཐིག་འཛམ་བུ་གསེར་གྱི་འཁོར་ལོ་ཡིས༎
མནན་ཚེ་ངན་སྤྱོད་སྐྱེ་བོའི་བག་ཡངས་ཀུན༎
བཀྲེས་སྐོམ་གདུང་བས་མནར་ལུས་ཇི་བཞིན་སྙམ༎
བརྣག་ནུས་ལས་འདས་ཕ་རོལ་རྒོལ་བའི་གཡུལ༎
རྣམ་པར་བཅོམ་པའི་མགོ་འཕྲེང་ཁྲག་གིས་བརླན༎
ལན་གཅིག་མིན་པར་གཤེར་བའི་དམར་འོད་ཀྱི༎
རྒོད་མ་ཁ་དེ་རྒྱ་མཚོའི་མཐའ་རུ་ཡིབས༎