[A:༡༩༩]གསེར་མངལ་སྟོབས་ལ་རྨུགས་འཛིན་འབྱོར་པའི་མཛོད༎
གཅིག་ཏུ་བསྡུས་འདྲའི་སྲིད་ཀུན་དགེ་ཕྱོགས་སུ༎
བསྒྱུར་བས་རྣམ་སྨིན་དཀར་པོའི་ཐིགས་པ་འབུམ༎
འཛག་བྱེད་དམ་པའི་སྤྱོད་ཚུལ་རྨད་དུ་བྱུང་༎
མཐོན་པོའི་མངའ་ཐང་ཕུན་ཚོགས་དཔལ་འབྱོར་ཀུན༎
བཀོད་པས་ཁྱད་འཕགས་རྣམ་དཔྱོད་དབྱར་རྔའི་སྒྲས༎
ཆེ་བའི་རྣམ་ཐར་བཟང་པོའི་གཙུག་ཕུད་ཅན༎
ཡ་རབས་དགའ་སྟོན་རྣམ་བཀྲའི་གཤོག་རླབས་ངོམ༎
ཀྱེ་མ་ཐོས་བསམ་བདུད་རྩི་ཡལ་བོར་ནས༎
ངན་གཡོ་ཟང་ཟིང་རྙོགས་པའི་བཟའ་བཏུང་གིས༎
ལྟོ་བ་ཁེངས་པའི་དྲེགས་ལྡན་མཐོན་པོའི་ཁྲིར༎
འཛེགས་ཀྱང་ཐ་ག་པ་དང་ཁྱད་པར་ཅི༎
ཡ་རབས་ཚལ་དུ་རིགས་རུས་ཆོ་འབྲང་གི།
ཡོངས་འདུའི་ལྗོན་པ་རྒྱས་པ་རྨད་བྱུང་ཡང་༎
ཆེ་ལྡན་བྱ་བའི་སྤྱོད་ཚུལ་མི་ཤེས་ན༎
གསེར་སྐྱོགས་སྣོད་དུ་ངན་སྐྱུགས་བླུག་དང་མཚུངས༎
མཁས་དང་གྲུབ་པའི་སྐྱེ་བར་ཁས་འཆེ་ནས༎
འཆད་རྩོད་རྩོམ་པའི་བློ་གྲོས་མཐུ་དམན་ན༎
གནོད་སྦྱིན་ནོར་ལ་སྤྱོད་པ་ཚེ་འཕོས་ནས༎
དབུལ་པོའི་ཁྱིམ་དུ་སྐྱེས་དང་ཁྱད་པར་ཅི༎
མི་འཛད་སྟོབས་འབྱོར་གཏེར་ལ་མངའ་བསྒྱུར་ཡང་༎