[A:༢༠༠]འདི་ཕྱིའི་ཕུན་ཚོགས་བསྒྲུབ་པའི་རྣམ་དཔྱོད་མིག།
ལོངས་ཚེ་ས་འོག་གནས་པའི་ཀླུ་ཚོགས་དང་༎
སྲང་ལ་བཏེག་ཚེ་ལྕི་ཡང་གང་གིས་འབྱེད༎
ཁུངས་ལྡན་ལོ་རྒྱུས་མཐོང་བར་རིགས་ལམ་ནས༎
འདྲེན་པའི་རྣམ་འབྱེད་ཤེས་རབ་མཐུ་ཕྲ་ཡང་༎
དམུས་ལོང་གཅིག་པུར་རྒྱུ་བའི་གོམ་སྟབས་བཞིན༎
འགལ་འདུའི་ཁུར་གྱིས་ལྕི་བའི་གླེགས་བམ་མང་༎
ལོ་རྒྱུས་གཞུ་ལ་དྲང་པོའི་རྒྱུད་དྲངས་ནས༎
ལེགས་བཤད་འདབ་ལྡན་གཡོ་བའི་ཉག་ཕྲན་ཅན༎
མི་ཤེས་རྨོངས་པའི་སྙིང་ལ་ཕོག་སྲིད་ཀྱང་༎
གཟུར་གནས་མཁས་པས་མཐོང་ཚེ་སྤྲོ་བ་འཕེལ༎
མི་མཇེད་ཞིང་གི་གངས་རིའི་སྤོ་ལ་སྡེ་བཞིའི་རྩལ་གསུམ་ཡོངས་སུ་རྫོགས་པའི་མཐོ་རིས་རྒྱལ་པོ་གདོང་ལྔའི་དབང་༎
རིམ་པར་བྱོན་ལ་བསྔགས་ཚིག་སྭ་སྟིའི་སྒྲ་ཡི་གདུབ་སིལ་འཁྲོལ་བས་ཡ་རབས་མདུན་སའི་ཁ་རྒྱན་སྤེལ་ལེགས་འདི༎
ཤེས་བྱའི་རྦ་ཀློངས་ཡིད་མཚོར་རོལ་པའི་བནྡེ་ཚངས་དབང་སྲས་མོས་བཞད་པའི་འཛུམ་ལྡན་ལེགས་བཤད་གཏེར་མཛོད་ཀྱིས༎
མི་བདག་གསུང་གི་རི་བོ་མན་དྷ་ར་ཡིས་བསྐུལ་ལྟར་དཔྱད་གསུམ་དག་པའི་འཆི་མེད་ལུས་ཕྲའི་པདྨོ་བསྐྲུན༎
གངས་ཅན་འཛིན་མའི་དཔྱིད་ཀྱི་མངལ་ཁུར་ལས༎
བློ་གྲོས་ཡལ་འདབ་དར་བའི་ཤེས་ལྡན་རྣམས༎
ངོ་མཚར་གཏམ་གྱི་ལེགས་བཤད་སྐྱེས་འདོད་ན༎