[A:༢༤]ཤུགས་དྲག་མི་དགེའི་མུན་པ་ས་འཛིན་རྐང་༎
རྣམ་དཀར་དགེ་བའི་འོད་སྟོང་ཞོ་འཐུང་རུས༎
ལག་ཉལ་གྲུབ་པས་བཅོམ་ཚེ་ཁྲིམས་ཀྱི་གཟི༎
ལེགས་བྱས་ས་སྲུང་སྟེང་ན་འོད་དུ་འབར༎
དེ་ནས་རྒྱལ་པོས་འགྲོ་བ་རྣམས་ཐར་པ་བླ་ན་མེད་པ་ལ་འགོད་པར་བྱེད་པའི་གྲོགས་སུ་ཡི་དམ་གྱི་ལྷ་ཞིག་ལ་བརྟེན་དགོས་པར་མཁྱེན་པ་ན། ལྷའི་བུ་མང་པོས་ནམ་མཁའ་ལས་ལུང་བསྟན་པ་ལྟར། སྨིན་མཚམས་ཀྱི་མཛོད་སྤུ་ལས་སྤྲུལ་པའི་དགེ་སློང་ཨ་ཀ་ར་མ་ཏི་ཤཱི་ལ་བྱོན་པ་ཕོ་ཉར་མངགས་ཏེ། རྒྱལ་པོ་ཨུ་ཊ་མ་ཊ་གེ་སར་ཞེས་བྱ་བ་དཔག་པར་དཀའ་བའི་རྫུ་འཕྲུལ་གྱིས་བཏུལ་ཏེ། ནང་པའི་བསྟན་པ་ལ་བཅུག་ནས་རྒྱལ་པོའི་དཔུང་དང་བཅས་ནས་འཕགས་པའི་མཐུས་སྐད་ཅིག་ལ་རྒྱ་མཚོའི་འགྲམ་གྱི་བྱེ་གླིང་ན་བྱོན་ནས་ས་བརྐོས་པའི་འོག་ཏུ་ཙན་དན་སྦྲུལ་གྱི་སྙིང་པོའི་གར་བུ་བྱུང་བ་བཅད་པའི་ནང་ནས་ཐུགས་རྗེ་ཆེན་པོ་བཅུ་གཅིག་ཞལ་དང་། པོ་ཏ་ལ་ནས་ཙན་དན་གོར་ཤི་ཤའི་དུམ་བུ། རྒྱ་མཚོའི་གླིང་གི་འཇག་མ་དང་གནས་ཆེན་བརྒྱད་ཀྱི་བྱེ་མ། ཆུ་བོ་ནི་རཉྫའི་བྱེ་མ་རྣམས་ལ་སངས་རྒྱས་དང་བྱང་ཆུབ་སེམས་དཔའ་མཐའ་ཡས་པ་བཞུགས་པ་གཟིགས་ནས་བྱེ་མའི་ཐུམ་བུ་དང་། རྩྭའི་ཕོན་པོ། མཆོད་རྟེན་པདྨའི་འཁོར་ལོ་ཅན་ནས། འཁོར་བ་འཇིག་འོད་སྲུངས། ཤཱཀ་ཐུབ་གསུམ་གྱི་རིང་བསྲེལ་སྙིམ་པ་རེ་དང་བཅས་པ་བསྣམས་ཏེ་རྒྱལ་པོ་ལ་ཕུལ། སླར་ཡང་ཡི་དམ་གྱི་ཐུགས་ཀ་ནས་སྤྲོས་པའི་འོད་ཟེར་གྱི་བརྡས་བསྟན་པ་ལྟར་སྤྲུལ་པའི་དགེ་སློང་གིས་བལ་ཡུལ་ནས་ཙན་དན་ཧ་རིའི་སྡོང་པོ་ལས་འཕགས་པ་ལོ་ཀེ་ཤྭ་ར་སྤྱན་དྲངས་ཏེ། རྒྱལ་པོའི་སྨིན་མཚམས་སུ་ཐིམ་མོ། །