[A:24]shugs drag mi dge'i mun pa sa 'dzin rkang //
rnam dkar dge ba'i 'od stong zho 'thung rus//
lag nyal grub pas bcom tshe khrims kyi gzi//
legs byas sa srung steng na 'od du 'bar//
de nas rgyal pos 'gro ba rnams thar pa bla na med pa la 'god par byed pa'i grogs su yi dam gyi lha zhig la brten dgos par mkhyen pa na/ lha'i bu mang pos nam mkha' las lung bstan pa ltar/ smin mtshams kyi mdzod spu las sprul pa'i dge slong a ka ra ma ti shI la byon pa pho nyar mngags te/ rgyal po u Ta ma Ta ge sar zhes bya ba dpag par dka' ba'i rdzu 'phrul gyis btul te/ nang pa'i bstan pa la bcug nas rgyal po'i dpung dang bcas nas 'phags pa'i mthus skad cig la rgya mtsho'i 'gram gyi bye gling na byon nas sa brkos pa'i 'og tu tsan dan sbrul gyi snying po'i gar bu byung ba bcad pa'i nang nas thugs rje chen po bcu gcig zhal dang / po ta la nas tsan dan gor shi sha'i dum bu/ rgya mtsho'i gling gi 'jag ma dang gnas chen brgyad kyi bye ma/ chu bo ni ranydza'i bye ma rnams la sangs rgyas dang byang chub sems dpa' mtha' yas pa bzhugs pa gzigs nas bye ma'i thum bu dang / rtswa'i phon po/ mchod rten padma'i 'khor lo can nas/ 'khor ba 'jig 'od srungs/ shAka thub gsum gyi ring bsrel snyim pa re dang bcas pa bsnams te rgyal po la phul/ slar yang yi dam gyi thugs ka nas spros pa'i 'od zer gyi brdas bstan pa ltar sprul pa'i dge slong gis bal yul nas tsan dan ha ri'i sdong po las 'phags pa lo ke shwa ra spyan drangs te/ rgyal po'i smin mtshams su thim mo/ /