[A:༢༩]བཞེད་ནས། དམར་པོ་རིའི་ས་ཕྱོགས་སུ་ལྕགས་རིའི་འཕྲེང་བ་གསུམ་དུ་བསྐོར་བའི་ནང་དུ་མཁར་དགུ་བརྒྱ་དགུ་བཅུ་རྩ་དགུ། དམར་པོ་རིའི་རྩེར་གཅིག་སྟེ་སྟོང་ཡོད་པ་དེ་དག་རྣམས་ལ་དྲིལ་བུ་དང་རྔ་ཡབ་མུ་ཏིག་གི་དྲ་བ་དྲ་ཕྱེད་ཀྱིས་མཛེས་ཤིང་ཡིད་དུ་འོང་བ། རྣམ་པར་རྒྱལ་བའི་ཁང་བཟང་ལ་འགྲན་པ། རྒྱལ་པོ་དང་བཙུན་མོའི་ཕོ་བྲང་གི་བར་དུ་དངུལ་དང་ཟངས་ཀྱི་ཟམ་པ་སྦྲེལ་བ། མཁར་གྱི་རྩ་བར་ཤིན་ཏུ་རྣོ་བའི་མདུང་ལ་བ་དན་ལྷབ་ལྷུབ་ཏུ་འཕྱོ་བ་སྟོང་བཙུགས་པ། ཕྱོགས་བཞི་ན་འདོད་རྒུའི་ཡོ་བྱད་མཐའ་དག་རང་དབང་མེད་པར་འདུ་བའི་སྒོ་བཞི་ལ་ལྕོག་བཞིས་རྣམ་པར་བརྒྱན་པ། ཕྱི་རོལ་ཏུ་རྟའི་རྒྱུག་ས། ཟབས་སུ་འདོམ་དོ། ། ཞེང་འདོམ་བཅོ་བརྒྱད། སྙུངས་སུ་འདོམ་སུམ་བརྒྱ་ཡོད་པ། དེ་ལ་སྤང་ལེབ་བསྒྲིགས་པའི་སྟེང་དུ་སོ་ཕག་བཏིང་བ། རྟ་གཅིག་བརྒྱུགས་ཀྱང་དུ་མ་བརྒྱུགས་པའི་སྒྲ་འབྱུང་བ། མདོར་ན་སྲིན་པོའི་རྒྱལ་པོ་ལང་ཀ་མགྲིན་བཅུའི་གྲོང་ཁྱེར་བསོད་ནམས་ཀྱི་མཐུས་གངས་ཅན་གྱི་ལྗོངས་སུ་འཕོས་པ་ལྟ་བུ་ཞིག་བརྩིགས་ནས། རྗེ་བློན་འབངས་འཁོར་མཐའ་དག་འདོད་པའི་ཡོན་ཏན་ལྔ་ལ་ལོངས་སྤྱོད་པའི་སྐབས་སུ།
སྤྲུལ་པའི་རྒྱལ་པོས་ཤར་ཕྱོགས་ནས་རྒྱ་རྗེའི་སྲས་མོ་ཀོང་ཇོ་སྤྱན་འདྲེན་པའི་ཉེར་བསྡོགས་སུ་སྤྱན་གཡོན་པའི་འོད་ཟེར་ལས་འཁོར་ལོས་སྒྱུར་བའི་རྒྱལ་པོ་སོགས་སྔར་ལྟར་སྤྲུལ་ནས། རྒྱའི་ཕོ་བྲང་ཀེ་རུའི་ཁྲི་སྒོར་ཕེབས་ཏེ་བློན་པོ་རིན་པོ་ཆེས། ངེད་བོད་ཀྱི་རྒྱལ་པོ་ཐུགས་རྗེ་ཆེན་པོའི་སྤྲུལ་པ་ཡིན་པས་ཁྱེད་ཀྱི་ལྷ་གཅིག་འདི་སྒྲོལ་མའི་སྤྲུལ་པ་ཡིན་པ་བཙུན་མོར་སྤྱན་འདྲེན་པས་སྐལ་རྫོངས་སུ་ཤཱཀྱ་མུ་ནི་དང་བཅས་པ་གནང་བར་མཛོད་ཅིག་དེ་ལས་ཕྱི་རོལ་དུ་གྱུར་ན་རྒྱ་ཡུལ་འབྱིན་ཅིང་། ཚུལ་བཞིན་བསྒྲུབས་ན་རྒྱ་བོད་ཀྱི་འཁྲུག་པ་ཕྱིས་ནས་རྒྱུན་གཅོད་དོ་ཞེས་རྒྱ་ནག་གི་སྐད་དུ་བརྡ་སྦྱར་བས། རྒྱལ་བློན་རྣམས་ཤིན་ཏུ་འཇིགས་པས་ཁས་བླངས་ཏེ་ལྷ་གཅིག་ལ་འགྲོ་བར་གསུངས་པས། ལྷ་གཅིག་