[A:29]bzhed nas/ dmar po ri'i sa phyogs su lcags ri'i 'phreng ba gsum du bskor ba'i nang du mkhar dgu brgya dgu bcu rtsa dgu/ dmar po ri'i rtser gcig ste stong yod pa de dag rnams la dril bu dang rnga yab mu tig gi dra ba dra phyed kyis mdzes shing yid du 'ong ba/ rnam par rgyal ba'i khang bzang la 'gran pa/ rgyal po dang btsun mo'i pho brang gi bar du dngul dang zangs kyi zam pa sbrel ba/ mkhar gyi rtsa bar shin tu rno ba'i mdung la ba dan lhab lhub tu 'phyo ba stong btsugs pa/ phyogs bzhi na 'dod rgu'i yo byad mtha' dag rang dbang med par 'du ba'i sgo bzhi la lcog bzhis rnam par brgyan pa/ phyi rol tu rta'i rgyug sa/ zabs su 'dom do/ / zheng 'dom bco brgyad/ snyungs su 'dom sum brgya yod pa/ de la spang leb bsgrigs pa'i steng du so phag bting ba/ rta gcig brgyugs kyang du ma brgyugs pa'i sgra 'byung ba/ mdor na srin po'i rgyal po lang ka mgrin bcu'i grong khyer bsod nams kyi mthus gangs can gyi ljongs su 'phos pa lta bu zhig brtsigs nas/ rje blon 'bangs 'khor mtha' dag 'dod pa'i yon tan lnga la longs spyod pa'i skabs su/
sprul pa'i rgyal pos shar phyogs nas rgya rje'i sras mo kong jo spyan 'dren pa'i nyer bsdogs su spyan g.yon pa'i 'od zer las 'khor los sgyur ba'i rgyal po sogs sngar ltar sprul nas/ rgya'i pho brang ke ru'i khri sgor phebs te blon po rin po ches/ nged bod kyi rgyal po thugs rje chen po'i sprul pa yin pas khyed kyi lha gcig 'di sgrol ma'i sprul pa yin pa btsun mor spyan 'dren pas skal rdzongs su shAkya mu ni dang bcas pa gnang bar mdzod cig de las phyi rol du gyur na rgya yul 'byin cing / tshul bzhin bsgrubs na rgya bod kyi 'khrug pa phyis nas rgyun gcod do zhes rgya nag gi skad du brda sbyar bas/ rgyal blon rnams shin tu 'jigs pas khas blangs te lha gcig la 'gro bar gsungs pas/ lha gcig