[A:༤༤]མཛད། ར་མོ་ཆེར་ཤཱཀྱ་མུ་ནི་གཙོ་འཁོར་རྣམས་བཞུགས་སུ་གསོལ་ཏེ། ཐུགས་རྗེ་ཆེན་པོ་འཇིག་རྟེན་དབང་ཕྱུག་གི་རྨད་དུ་བྱུང་བའི་ཞིང་ཁམས་དམ་པར་བདེ་བར་གཤེགས་པ་ཞི་བ་དང་ཁྲོ་བོའི་ལྷ་ཚོགས་རྣམས་ཀྱི་དཀྱིལ་འཁོར་གྱི་འཁོར་ལོ་ཀུན་གསལ་བུ་མོའི་འགྲམ་པར་རླུང་གི་རྒྱལ་མཚན་གྱིས་འཁྱུད་པ་ལྟར་རྣམ་པར་བཀྲ་ཞིང་། མཛེས་སྡུག་རྔམ་མརྗིད་ཀྱི་རྣམ་འགྱུར་གྲངས་མེད་པ་འདྲེན་བྱེད་ཀྱི་ཡུལ་དུ་ཆོག་མི་ཤེས་པ་སྟོན་པར་མཛད་པའི་མཆོག་གསུམ་དམ་པའི་སྐུ་བརྙན་གྱིས་གང་བའི་ར་ས་འཕྲུལ་གྱི་གཙུག་ལག་ཁང་ཟུང་ལ་རབ་ཏུ་གནས་པའི་དགའ་སྟོན་གྱིས་མཆོད་པའི་ཡོ་བྱད་བཀོད་པས་ཁྱད་པར་དུ་འཕགས་པ་བཤམས་ནས། ཆོས་རྒྱལ་ཡབ་ཡུམ་བློན་འབངས་རྣམས་ཀྱིས་ཕྱག་ཏུ་མེ་ཏོག་གི་འཕྲེང་བ་བཟུང་བ་དང་བཅས་བདེན་ཚིག་གི་སྨོན་ལམ་རྒྱ་ཆེན་པོའི་རྟ་བདུན་གྱི་དྲངས་པས། བདེ་སྟོང་གཉིས་མེད་ཟུང་དུ་འཇུག་པའི་འགྱུར་བ་མེད་པ་མཆོག་གི་དབྱིངས་ལས། རང་སྣང་ལྷུན་གྱིས་གྲུབ་པའི་གཞལ་མེད་ཁང་ཆེན་པོ་ནས། བདེ་བར་གཤེགས་པ་ཞི་ཁྲོ་རབ་འབྱམས་ཀྱི་ཉིན་བྱེད་དབང་པོ་འགོག་པ་མེད་པར་རྒྱུ་བས། མཐའ་འཁོབ་བསིལ་ལྡན་གྱི་ས་གཞི་ཀུན་ལ། རྒྱལ་བའི་བསྟན་པ་པདྨ་དཀར་པོའི་འདབ་བརྒྱ་རྣམ་པར་རྒོད་པས་བོད་འབངས་ར་ཡིག་གཉིས་པའི་ཚོགས་ཀུན་དགའ་བའི་གར་དང་སྙན་པའི་དབྱངས་ཀྱི་ང་རོ་སྲིད་རྩེའི་བར་དུ་སྒྲོགས་པར་གྱུར་ཏོ༎ སྨྲས་པ།
མ་སྨད་ལེགས་བྱས་མངལ་གྱིས་ལྕི་བའི་ཁུར༎
ངོ་མཚར་སྙིང་པོ་ཡེ་ཤེས་སྒྱུ་མའི་གར༎
ཕན་བདེ་ཟླ་ཤེལ་གསར་པའི་ག་པུར་ཐིགས༎
འབུམ་ཕྲག་འཛག་པའི་རྣམ་པར་དཀར་བའི་རྒྱུན༎
གཅིག་ཏུ་བསྡོམས་པའི་ཀེ་ལ་ཤ་ཡི་ཆུས༎
སྲིད་འདིར་འཁོར་བའི་མ་རིག་དྲི་མའི་ཚོགས༎