[A:༤༣]དབང་ཕྱུག་ཡབ་ཡུམ་གྱི་ཡེ་ཤེས་སྒྱུ་མས་སྤྲུལ་པའི་གཙུག་ལག་ཁང་ཆེན་པོ་རྫོགས་པར་གྲུབ་ནས། ཇི་སྲིད་རྟ་བདུན་གྱི་དབང་པོས་གདུང་བྱེད་ཀྱི་ཡུལ་དེ་སྲིད་སྐྱེ་རྒུ་ཀུན་ལ་ཕན་པ་དང་བདེ་བ་བླ་ན་མེད་པ་འབྱུང་བའི་སྒོ་དམ་པ་མཛད་དོ༎ ་
དེ་ནས་རྒྱལ་པོས་འཕྲུལ་སྣང་གི་གཙང་ཁང་བྱང་ངོས་སུ་རང་བྱོན་ཐུགས་རྗེ་ཆེན་པོ་གཙོ་འཁོར་སྤྱན་འདྲེན་པའི་སྟ་གོན་མཛད་པས། མཚན་ཕྱེད་ལ་ཕོ་བྲང་གི་མཐོངས་ཁུང་ནས་གཤེགས་ཏེ་གཙང་ཁང་བྱང་མར་ཕེབས། ནང་པར་རྒྱལ་པོ་འཁོར་བཅས་ཀྱིས་ལྷ་རྣམས་སྤྱན་འདྲེན་པའི་བྱ་བ་ལ་ཞུགས་པའི་ཚེ་སྐུ་རྣམས་མི་སྣང་བས་ཐེ་ཚོམ་དུ་གྱུར་པ་ན། སྤྲུལ་པའི་ནེ་ཙོ་ཞིག་གིས་སྔར་གྱི་རྒྱུ་མཚན་རྣམས་བརྗོད་པས་དོན་ལ་གནས་པར་གདའ་བས་རྒྱལ་པོ་དགྱེས་ཏེ། ལྷ་དང་མི་ལས་ཁྱད་པར་དུ་འཕགས་པའི་དངོས་བཤམས་ཡིད་ཀྱིས་སྤྲུལ་པའི་ཆུ་འཛིན་གྱི་འཕྲེང་བ་མཐའ་ཀླས་པར་འཁྲིགས་པ་ལས། མཆོད་པའི་གྲུ་ཆར་མི་ཟད་པའི་བདག་ཉིད་ཅན་གྱི་ལེགས་བྱས་ཀྱི་མྱུ་གུ་སྐལ་བཟང་སྐྱེ་རྒུའི་དཔྱིད་དུ་སྨིན་པར་མཛད་དོ། ། དེ་ནས་ར་སའི་གཙུག་ལག་ཁང་གི་གཙང་ཁང་དབུས་མར་དེ་བཞིན་གཤེགས་པ་མི་འཁྲུགས་པ་གཙོ་འཁོར་དགུ། གཙང་ཁང་གཡས་ལ་སངས་རྒྱས་སྣང་བ་མཐའ་ཡས་གཙོ་འཁོར་དགུ། གཙང་ཁང་གཡོན་དུ་བྱམས་པ་ཆོས་ཀྱི་འཁོར་ལོ་གདན་དྲངས་ཏེ་འཁོར་དུ་སྒྲོལ་མ་བརྒྱད། གཙང་ཁང་ལྷོ་ན་ཇོ་བོ་མི་བསྐྱོད་རྡོ་རྗེ་གདན་དྲངས་པའི་འཁོར་དུ་ཁྲོ་བོ་དང་གནོད་སྦྱིན་སྟོབས་ལྡན་གྱིས་བསྐོར་བ། གཙང་ཁང་བྱང་དུ་རང་བྱོན་ཐུགས་རྗེ་ཆེན་པོ་གཙོ་འཁོར་གསུམ་གྱི་སྟེང་དུ་ཡི་གེ་དྲུག་པ། དོན་ཞགས། ཁ་སརྤ་ཎི། འཇིག་རྟེན་དབང་ཕྱུག་རྟ་མགྲིན། བདུད་རྩིའི་འཁྱིལ་པ་རྣམས་བཞེངས། ཀླུ་སྦྲུལ་མགོ་ཉི་ཤུ། དགའ་བོ། འཇོག་པོ། གནོད་སྦྱིན་ནཱ་ག་ཀུ་བེ་ར། དྲི་ཟ་ཟུར་ཕུད་ལྔ་པ། དཔལ་ལྷ་མོ་རྣམས་སོ་སོས་བསྐུལ་བ་བཞིན་བཞེངས། གཞན་ཡང་བོན་དང་སྒྲུང་གི་གཏམ་རྒྱུད་ལས་བྱུང་བའི་བཀོད་པ་མཐའ་ཡས་པ་ཡང་བྲི་བར་