[A:༨༣]༈ དེ་ནས་མི་གཡོ་བའི་སྙིང་སྟོབས་ཕུལ་དུ་བྱུང་བའི་རྒྱལ་བའི་སྲས་ཀྱི་སྤྱོད་པ་རླབས་པོ་ཆེ་བསྐྲུན་པ་ལ་བག་ཚ་བ་མི་མངའ་ཞིང་། རྣམ་པར་དག་པའི་ཚུལ་ཁྲིམས་ཡན་ལག་བརྒྱད་དང་ལྡན་པའི་དལ་འགྲོའི་ཀླུང་གིས། རྒྱལ་བའི་བསྟན་པ་མཁའ་ལྡིང་རྒྱལ་མཚན་ཅན་གྱི་བགྲོད་བྱེད་ལ་སྲི་ཞུའི་དཀའ་ཐུབ་ཀྱི་བརྟུལ་ཞུགས་ཡང་དག་པར་བཟུང་། ཐུན་མོང་དང་ཐུན་མོང་མ་ཡིན་པའི་རིག་པའི་གནས་ཀྱི་ཡ་ལད་བཙན་པོ་གྱོན་ཞིང་། མཛངས་པའི་ཡོན་ཏན་གྱི་དུ་ཀཱུ་ལའི་བ་དན་དཀར་པོ་སྲིད་པའི་རྩེ་མོར་གཡོ་བའི་པཎ་གྲུབ་དམ་པ་དཱི་པཾ་ཀ་ར་ཤྲཱི་ཛྙཱ་ནའི་སྙན་གྲགས། ལྷ་བླ་མའི་སྙན་གྱི་དབང་པོར་སོན་པ་ལ་བརྟེན་ནས། ནག་ཚོ་ལོ་ཙཱ་བ་རྒྱ་གར་དུ་ཆོས་སློབ་པར་ཕྱིན་པ་སླར་རང་ཡུལ་དུ་འཁོར་བ། ཞབས་སེན་གྱི་པདྨོ་རྣམ་པར་བསྐྱོད་པའི་ཕོ་ཉར། རིན་པོ་ཆེ་གསེར་གྱི་ཕྱག་རྟེན་སོགས་གྱ་ནོམ་པའི་དངོས་པོ་དང་བཅས་བརྫངས་པ་ལམ་དུ་ཉེས་པའི་སྐྱོན་དང་བྲལ་ནས། བྲྀ་ཀ་མ་ལ་ཤྲཱི་ལར་སླེབས་ཏེ། རྒྱ་བརྩོན་སེང་གིས་མཇལ་བའི་གྲོགས་བགྱིས་ཏེ། ཇོ་བོའི་སྤྱན་སྔར་ཕྱག་རྟེན་རྣམས་དང་བཅས། སྔར་བསྟན་པ་ལ་འཕེལ་འགྲིབ་བྱུང་ཚུལ། དེང་སང་བསྟན་པ་དར་ཡང་སྡེ་སྣོད་ལག་ལེན་དུ་འདེབས་པར་དཀའ་ཞིང་། དེ་དག་གི་ཚུལ་ལ་བླང་དོར་གྱི་གནས་སྟོན་པར་ཇོ་བོ་ལྟ་བུ་ལས་གཞན་པའི་པཎྜི་ཏས་ཕན་ཐོགས་པར་དཀའ་ཚུལ་རྣམས་ཞུས་ཏེ། ལོ་ཙཱ་བ་རེ་ཞིག་སློབ་གཉེར་བྱེད་པ་ལྟར་བསྡད། ཇོ་བོས་ཡི་དམ་གྱི་ལྷ་དང་གྲུབ་པའི་རྣལ་འབྱོར་མ་ལ་དྲི་བ་མཛད་པས། སྤྱི་སྒོས་མཐའ་དག་ཏུ་འཕྲིན་ལས་ཀྱི་སྒོ་ཆེ་ཞིང་། ཁྱད་པར་ཨུ་པ་སི་ཀ་ཞིག་ལ་བརྟེན་ནས་ཕན་ཐོགས་འབྱུང་བར་ལུང་བསྟན་པར་བརྟེན། ཐབས་མཁས་ཀྱི་མཛད་པས་མངའ་རིས་སུ་བྱོན་ཏེ། མཐོ་ལྡིང་གི་གཙུག་ལག་ཁང་དུ་བཞུགས་ནས། ལྷ་བླ་མ་སོགས་ལས་ཅན་རྣམས་ལ་ཟབ་རྒྱས་ཀྱི་ཆོས་དུ་མ་གསུངས་ཤིང་། བོད་དུ་ཆོས་བབ་ཅོལ་དུ་སྤྱོད་པ་རྣམས་ཀྱི་གཉེན་པོར་བྱང་ཆུབ་ལམ་གྱི་སྒྲོན་མར་གྲགས་པའི་བསྟན་བཅོས་ཁྱད་