[A:༨༢]པོས་གསང་སྔགས་ཐིག་ལེའི་སྐོར་བསྒྱུར་ནས་རབ་བྱུང་དུ་མ་ཁྱིམ་པར་ཕབ་པས་ཆོས་ལོག་མཁན་པོ་ཡིན་ཞེས་སྨྲ་བ་ནི། པཎྜི་ཏ་རང་གི་རྟོགས་པའི་ཡོན་ཏན་གྱི་དོད་མ་མཉམ་པའི་རབ་ཏུ་བྱུང་བ་འགའ་ཞིག་སྔགས་ཀྱི་དེ་ཁོ་ན་ཉིད་མ་རྟོགས་པར་འཆལ་བའི་སྐྱོན་བྱུང་བ་བདེན་ནའང་། པཎྜི་ཏ་གསང་བ་ཤེས་རབ་ལྟ་བུའི་གྲུབ་པའི་དབང་ཕྱུག་ཆོས་ལོག་མཁན་པོ་ཞེས་ངན་སྨྲས་བྱེད་པ་ནི། རང་ཉིད་ངན་སོང་མུ་མཐའ་མེད་པ་བསྒྲུབ་པའི་རྒྱུ་ཡིན་པས་ཤེས་ལྡན་རྣམས་བག་ཡོད་པར་བྱོས་ཤིག། སྨྲས་པ།
ཡིད་སྲུབས་བྱེད་པོའི་དཔུང་གི་སྔོ་བསངས་མའི༎
བདེ་སྲིད་རྣམ་པར་བཞད་པའི་འདབ་སྟོང་ཚལ༎
ཟུམ་ཚེ་སླར་ཡང་སྐལ་བཟང་རྟ་བདུན་གྱིས༎
ཐུབ་བསྟན་ཉིན་བྱེད་གསར་པ་དྲངས་སོ་ཀྱེ༎
ནུས་པའི་སྟོབས་ལྡན་དཔའ་དང་རྟུལ་ཕོད་པའི༎
དཔལ་ལྡན་ཕྱོགས་ལས་རྒྱལ་བའི་རྡོ་རྗེའི་སྡེས༎
རྣོན་པོའི་ཉག་ཕྲན་རྒྱུད་ལས་འཕོས་པའི་ཚེ༎
སྡིག་ཅན་བཙད་པོའི་སྙིང་ལ་ཟུག་རྔུ་བྱིན༎
ཨེ་མ་མཁས་བཙུན་བཟང་པོའི་སྙན་གྲགས་ཀྱི༎
ཡོན་པོར་བལྟ་བའི་མིག་གི་ལྕགས་ཀྱུ་ཡིས༎
བྱང་ཆུབ་འོད་སྟོང་གསལ་མཛད་སྒྲ་འཛིན་གྱི༎
ཞགས་པའི་ཕོན་པོ་ཡང་ཡང་འགུགས་སམ་སྙམ༎