[A:༨༨]འཆང་བ་ཤ་སྟག་ཏུ་བྱོན་པའི་སྙན་གྲགས་ཧ་རི་ཙན་དན་གྱི་སྡོང་པོ་ཟླ་འཕྲེང་གྲངས་མེད་པའི་ས་འཛིན་གྱི་ཁོང་ལས་བརྒལ་བར་གཡུར་ཟ་ལྡེམ་མོ། ། སྨྲས་པ།
སྐབས་གསུམ་རྨུ་ཡི་ཉག་ཐག་ལས་བརྒྱུས་ས་མཚོའི་མུ་ཏིག་འཕྲེང་བ་ཅན༎
གནམ་གྱི་སྐས་ལས་བདེ་བར་བབས་པའི་འཁོར་ལོ་རིན་ཅེན་རྒྱུ་བའི་ཤུགས
ཚངས་བཅོས་སྡེར་བཅས་མགོ་བོ་བྲེགས་ཚེ་ས་འདིར་འཕོས་པའི་རཱ་མ་ཎ༎
མཐོ་རིས་ངོ་མཚར་གཏམ་གྱི་ཨུཏྤལ་སྐལ་ལྡན་རྣ་བའི་རྒྱན་དུ་སྤུད༎
རིགས་ཀྱི་མངོན་མཐོའི་ཉེ་བའི་ཚལ་ན་ལྡེམ་ལྡེམ་འཁྲིགས་པའི་ལག་འགྲོའི་སྙིང་པོའི་ས་སྐྱེས་དཔལ༎
དཔལ་ཁྱིམ་ལྟར་དཀར་ལེགས་ལམ་ཡལ་ག་ལིང་ལིང་གཡོ་བར་དགེ་བཅུའི་ལྕུག་ཕྲན་བྱ་མ་རྟ༎
རྟ་མཆོག་སྲབ་སྐྱོགས་ཁྲིམས་ཀྱི་མེ་ཏོག་ལོང་ལོང་འདབ་མ་པད་དཀར་གཞོན་ནུའི་ཆུན་པོ་བཞིན༎
བཞིན་རས་ཕན་བདེའི་རྒྱན་མཆོག་ཟེའུ་འབྲུ་ཤིག་ཤིག་སྤུངས་པའི་བྱང་གྲོལ་དྲི་བསུང་བླ་ན་མཚར༎
དེ་ལྟར་ཕུལ་དུ་བྱུང་བའི་སྙིང་སྟོབས་ཀྱི་གོ་ཆ་བཙན་པོ་གྱོན་ནས་རྣོ་ངར་མི་བཟད་པའི་མཚོན་ཆས་བདུད་སྡེའི་སྙིང་ལ་བརྣག་ནུས་ལས་འདས་པའི་དུ༔ཁ་སྟེར་བའི་བྱེད་པོ་ལྷ་ལུང་དཔལ་གྱི་རྡོ་རྗེས། མེ་ཏོག་མདའ་ཅན་གྱི་འདབ་བརྒྱ་རྣམ་པར་བཞད་པའི་ཟེའུ་འབྲུ་གླང་དར་མ་འུ་དུམ་བཙན་ཉི་མའི་བུའི་གངས་རིའི་དུམ་བུ་གསར་དུ་ཆད་པའི་འཕྲེང་བ་ལྟ་བུའི་མཆེ་བའི་གྲོང་ཁྱེར་དུ་སྤྱུགས་པའི་མཇུག་ཏུ། རྗེ་འབངས་ཀྱི་གོ་རིམ་རྣམ་པར་ཞིག་ནས་ལོ་སུམ་བརྒྱ་