[A:༧]ཟླ་བ་བཅུ་ཕལ་ཆེར་ལོན་པ་ལེགས་པར་སྦྱར་བ་ལྷའི་སྐད་དུ་རུ་དྲ་ཞེས་པ་བསིལ་ལྡན་པ་རྣམས་དྲག་པོར་བརྗོད་པ། རྒྱ་ནག་པ་དབང་ཐང་དང་བསྟུན་པའི་མིང་གིང་ཤིང་། བོད་ཡུལ་དུ་ལྕགས་ཕོ་སྤྲེའུར་འབོད་པའི་དཔྱིད་ཐ་ས་གས་ཉ་བ་མེ་ཏོག་ཅན་གྱི་ཟླ་བ། རྒྱ་ནག་པ་སི་ཡོལ་དུ་བརྗོད་པའི་ཡར་ངོའི་ཚེས་བདུན་གྱི་རེས་གཟའ་འོད་ཟེར་བདུན་པ་དང་། ལས་སྐར་རྒྱལ་ལ་བབས་པ་ན་ལུམྦི་ནིའི་ནགས་སུ་སྐུ་བལྟམས། དེ་ནས་ལང་ཚོའི་ཀུནྡ་རྣམ་པར་རྒྱས་པའི་ཟིལ་མངར་གྱི་སྒྱུ་རྩལ་དྲུག་ཅུ་རྩ་བཞིའི་ཡལ་འདབ་ཀྱི་ཡོན་ཏན་ཀུན་ལ་རང་གིར་བགྱིས་ཤིང་། པདྨོའི་སྙེམས་པ་ཐོགས་པའི་རི་དྭགས་མིག་ཅན་གྱི་དོན་ཡོངས་སུ་ཚང་བའི་གྲགས་འཛིན་མ་དང་ས་མཚོ་མ་སོགས་བཙུན་མོར་དབང་བསྐུར་ཏེ་ལོ་ཉི་ཤུ་རྩ་དགུའི་བར་དུ་ཉི་འོག་གྱི་རྒྱལ་ཕྲན་གཉིས་འཐུང་གི་སྤྱི་བོར་འཇིགས་པ་མེད་པའི་རྒྱལ་ཐབས་ཀྱི་བྱ་བའི་སྐད་གསང་མཐོན་པོས་རང་བྱན་དུ་འགྱིང་བར་དབང་ཐོབ་ནའང་། མཆོག་གི་སྤྲུལ་སྐུའི་མཛད་པ་སྟོན་པའི་ཆེད་དུ། དགུང་ལོ་ཉེར་དགུ་པ་ཀུན་འཛིན་ཞེས་པ་ས་ཕོ་བྱི་བ་ལ་རང་བྱུང་གི་སྒོ་ནས། རབ་བྱུང་གི་དངོས་པོ་ཡོངས་སུ་རྫོགས་ཏེ། ལོ་དྲུག་ཏུ་དཀའ་བ་སྤྱད་པས་ལང་ཚོ་ཕུན་སུམ་ཚོགས་པ་ལས་གཞན་དུ་གྱུར་པ་ན། དགའ་མོ་དང་དགའ་སྟོབས་མས་བ་སྟོང་གི་འོ་མ་ལན་བཅུ་དྲུག་གི་བར་དུ་ཉིང་ཁུར་བྱས་པའི་འོ་ཐུག་སྦྲང་རྩི་དང་སྦྱར་བའི་ཀུན་ཏུ་བཟང་པོའི་མཆོད་སྤྲིན་གྱིས་སྐུ་སུ་ཝརྞའི་མཆོད་སྡོང་ཉི་གཞོན་འབུམ་གྱིས་འཁྱུད་པ་ལྟར་གྱུར་ཏེ་རྡོ་རྗེ་གདན་དུ་བྱང་ཆུབ་ཀྱི་ཤིང་དྲུང་ན་འཆི་མེད་བདག་པོས་རྩྭ་འཚོང་གྱི་རྣམ་པར་སྤྲུལ་ཏེ་ཕུལ་བའི་རྩྭའི་གདན་ལ་བཞུགས་ནས། ཆུ་སྲིན་རྒྱལ་མཚན་ཅན་སྡེ་དང་བཅས་པའི་གཡུལ་ལས་རྣམ་པར་རྒྱལ་བའི་བ་དན་ནམ་མཁའི་མཐའ་ཀླས་པར་བསྒྲེངས་ཏེ། དགུང་ལོ་སོ་ལྔ་པ་རྒྱལ་བ་ཞེས་པ་ཤིང་རྟའི་ས་གས་ཉ་བའི་བཅོ་ལྔའི་སྐྱ་རེངས་ཤར་བ་ན་ཡེ་ཤེས་མཆོག་གི་བདུད་རྩི་མངོན་དུ་མཛད་དོ། ། མདོ་ལས། དེའི་ཉིན་མོ་ཟླ་བ་སྒྲ་གཅན་གྱིས་བཟུང་