[A:༩༠]ནག་མོ་ཨ་ལན་ལ་བུ་ཉི་ཟླའི་ཟེར་ལས་སྐྱེས་པ་ཡང་བཤད་ཅིང་། གཏམ་རྒྱུད་འགའ་ཞིག་ཏུ་གཞོན་ནུ་ཁ་དོག་སེར་པོ་ཅན་ཞིག་གུར་གྱི་མཐོངས་ནས་བབས་ཏེ་དགའ་མགུར་སྤྱད་ནས་ཕྱིར་འགྲོ་བ་ན་གུར་གྱི་སྒོ་ལས་ཁྱིའི་གཟུགས་འཐོན་པ་ཞིག་གི་བུ་བྱུང་བས་གནམ་གྱི་བུ་ཞེས་བཏགས་པར་གྲགས་ཤིང་། གང་ལྟར་བོ་དོན་ཆར་མུ་གན་ཡིན་པས། མ་ངེས་པའི་གཏམ་མང་པོ་སྨྲ་བ་ནི་རང་ཉིད་གསལ་བར་སྟོན་པའི་རྒྱུ་ཡིན་ལ། རྭ་སྒྲེང་དང་རྒྱལ་ལྷ་ཁང་དུ་ཧོར་དམག་གིས་དགེ་འདུན་དུ་མ་བཀྲོངས་པའི་གླིང་ལོག་དེ་ནི། དགེ་བའི་བཤེས་གཉེན་པོ་ཏོ་བ་དང་དུས་མཚུངས་པས་དུས་ཚོད་འདི་དག་ལས་སྔ་བར་མངོན་ནོ། ། དེ་ནས་མི་རིང་བར་རྒྱལ་པོ་རྣམ་པར་དཀར་བའི་ལས་ལ་འཇུག་པའི་བསམ་པ་སྐྱེས་ཏེ་རྒྱ་སྨན་དང་། དཔོན་པོ་དོར་རྟ་བོད་དུ་བཏང་བར་སོག་མཇལ་མོར་བབས། རྗེ་སྤྱན་སྔ་རིན་པོ་ཆེ་ལ་དུན་ཐང་དུ་བྱོན་ཏེ། སྒོམ་པ་ཤཱཀ་རིན་སྣ་ལེན་དུ་བཏང་བ་གསོད་པར་བརྩམས་པ་ན། སྤྱན་སྔ་རིན་པོ་ཆེས་སྒྲོལ་མ་ལ་གསོལ་བ་བཏབ་པས་རྡོ་ཆར་བབས་པར། སྤྱན་སྔ་རིན་པོ་ཆེ་ལ་གུས་པར་བྱས་ཏེ། བོད་ཤིང་སྒོ་ཅན་ཕལ་ཆེར་གྱི་བབས་བླངས་ནས། ཤར་ཀོང་པོའི་ཡུལ་ཡན་ཆད་ནས། ནུབ་བལ་པོ་དང་། ལྷོ་མོན་ལ་ཐུག་པ་ཚུན་ཆད་ཀྱི་བཙན་པོའི་མཁར་རྣམས་བསྒྱེལ་ཞིང་། གོང་མ་རྒྱལ་པོའི་ལུང་ལས་མི་འདའ་བའི་རྒྱལ་ཁྲིམས་བཙན་པོས་གཉའ་བ་མནན་ཏེ་ཕོ་བྲང་ཆེན་པོར་ཕོ་ཉ་བ་མངགས་ནས། བོད་མཐའ་འཁོབ་ཀྱི་རྒྱལ་ཁམས་ན། དགེ་འདུན་གྱི་སྡེ་ནི་བཀའ་གདམས་ཆེ། ངོ་བསྲུང་ནི་སྟག་ལུང་ཆོས་རྗེ་མཁས། གཟི་བརྗིད་ནི་འབྲི་ཁུང་སྤྱན་སྔ་ཆེ། ཆོས་ནི་ས་སྐྱ་པཎྜི་ཏ་མཁས་པར་འདུག་པས་གང་སྤྱན་འདྲེན་གྱི་ལུང་སྩོལ་ཅིག་ཞུས་པར། ཚེ་འདིའི་དཔལ་འབྱོར་ཕུན་ཚོགས་མཐའ་དག་འཛམ་གླིང་འདི་ན་ཇིང་གིར་རྒྱལ་པོའི་ལུགས་བཞིན་སྤྱད་པ་ལས་ལྷག་པ་མ་མཆིས་པས། འཇིག་རྟེན་ཕྱི་མ་ཕན་ཆད་དུ་ཐར་པ་དང་ཐམས་ཅད་མཁྱེན་པའི་ལམ་བཟང་པོ་སྟོན་པའི་བླ་མ་ཞིག་