[A:༩༡]གལ་ཆེ་བར་འདུག་པས། ས་སྐྱ་པཎྜི་ཏ་སྤྱན་འདྲེན་པའི་བཀའ་མཆིད་དང་། ཆོས་རྗེ་ས་སྐྱ་པར་ཆབ་ཤོག་དང་བཅས་ཕོ་ཉ་ཕྱིར་སོན་པ་བཞིན། རྒྱ་སྨན་གྱིས་ས་སྐྱར་ཕྱིན་ཏེ་ལུང་བསྒྲགས་པས། རྗེ་ས་པཎ་ཡང་། རྗེ་བཙུན་གྲགས་པའི་ཞལ་ཆེམས་སུ། ཁྱོད་ཀྱི་ཚེ་མཇུག་ལ་ཞྭ་ཁྲ་འཕུར་བ་འདྲ་བ། ལྷམ་ཕག་གི་སྣ་འདྲ་བ་གྱོན་པ། ཡུལ་སྐད་རིགས་མི་གཅིག་པའི་རྒྱལ་ཁམས་ནས་གདན་འདྲེན་པ་འབྱུང་བས། དཀོན་ཅོག་གསུམ་གྱི་སྒྲ་མི་གྲག་པའི་སར། རྒྱལ་བའི་བསྟན་པ་རིན་པོ་ཆེ་དར་རྒྱས་འོང་བས་ཐེ་ཚོམ་མེད་པར་སོང་ཞིག་པའི་བཀའ་དྲན་ཏེ་ཞལ་གྱིས་བཞེས་པ་ཡིན་ནོ། །
དེ་ཡང་རྗེ་བཙུན་ཆེན་པོ་འདི་ཉིད་ཀྱི་རིགས་ནི། གནམ་ནས་ལྕེ་རིང་གཡུ་རིང་། གཡུ་བསེ་མཆེད་གསུམ་ལས། ཆུང་བས་མི་རྗེ་མཛད་དེ། གཡུ་བསེ་བྱི་ལ་སྤུན་བཞི་བྱུང་བ། འདོང་གི་རུས་ཆེན་བཅོ་བརྒྱད་དང་འཁྲུགས་པས་གནམ་ལ་གཡུ་རིང་གི་རོགས་མཛད་དེ་བཏུལ་ནས་བྲན་དུ་བཀོལ། གཡུ་རིང་གི་རྨུའི་བུ་མོ་དམུ་ས་ལྡེམ་ཁབ་ཏུ་བཞེས་པར་སྲས་མ་སངས་སྤུན་བདུན་བྱུང་བའི་ཆེ་བ་དྲུག་དང་ཡབ་ལྷ་ཡུལ་དུ་བྱོན། ཆུང་བའི་སྲས་ཐོག་ཚ་དཔའ་བོ་སྟག་བྱུང་བར་མོན་བཟའ་མཚོ་མོ་རྒྱལ་ཁབ་ཏུ་བསུས་པ་ལ་སྲས་གཡའ་སྤང་སྐྱེས་འཁྲུངས། སྲིན་པོ་སྐྱ་རེངས་ཁྲག་མེད་བསད་། གཡའ་གྲུམ་བསིལ་མ་ཕྲོགས་ཏེ་ཁབ་ཏུ་བཞེས་པར་སྲས་ཤིག་བྱུང་བ་དེ་སྲིན་པོ་དང་འཁོན་པའི་བར་དུ་སྐྱེས་པས་མིང་འཁོན་པར་སྐྱེས་སུ་བཏགས་པ་ལ་འཁོན་གྱི་གདུང་བརྒྱུད་ཅེས་པའི་དོན་དེ་ལྟར་ཡིན་ཞིང་། ཆོས་རྗེ་དཀོན་ཅོག་ལྷུན་གྲུབ་པས། དེ་ལྟར་འཆི་མེད་འོད་གསལ་ལྷ་ཡི་རིགས། ། མ་རིག་ལས་འཁོན་འཇམ་དབྱངས་སྤྲུལ་པའི་སྐུ། ། ས་སྐྱ་པ་ཞེས་གྲགས་པ་གསལ་ལྡན་པ། ། ཞེས་གསུངས་པ་ཡང་གཟུར་གནས་ཀྱིས་བལྟས་ན་རང་བཞིན་བརྗོད་པའི་རྒྱན་དུ་མཆིས་སོ། ། འཁོན་པར་སྐྱེས་ཀྱིས་ཇོ་མོ་བཙན་མོ་བཟའ་ལྕེ་སྨན་གཉིས་ལ་སྲས་དཔལ་པོ་ཆེ་འཁྲུངས་པ། ཡབ་ཀྱིས་