[A:༦༢༠]མཐོང་མེད་པར་འདོད་པ་ལ་བཏང་བའི་རིགས་པ་རྣམས་ནི། མཁས་རློམ་གཞན་སུ་ལ་ཡང་མ་མཐོང་ངོ༌། །ལེགས་བཤད་རྩོམ་པའི་ཚེ་རྣ་བར་སྙན་ཅིང་འབྲེལ་ཆགས་ལ། མཁས་པ་དག་གིས་མཐོང་ན་སྔོན་མེད་པའི་རྟོགས་པ་བསྐྱེད་པ་ནི། རྗེ་ཉིད་ཀྱི་བཀའ་འབུམ་མཐོང་བས་གསལ་ལོ། །ཆོས་བརྒྱད་མགོ་སྙོམས་པ་ནི། ཀུན་ལ་གྲགས་ཤིང་ཁྱད་པར་དུ། ས་སྐྱ་འཁོན་གྱི་གདུང་བརྒྱུད་ལ་སོགས་པ་ཆེ་དགུ་དག་གིས་ཆོས་ཞུས་པས། སྐུ་ཚེ་ལ་མི་གཟན་ནམ་ཞུས་པས། དེ་ལ་དགའ་ཚོར་མེད་པས་སྐྱོན་མེད་གསུང་པ་ལྟ་བུའོ། །ཡོ་བྱད་ཀྱི་འཛིན་པ་དང་བྲལ་བ་ནི། ཡོ་བྱད་ཕྱག་ཏུ་བྱུང་བ་ཐམས་ཅད་ལ་ཡང་ན་བླ་མ་ལ་འབུལ་བ། ཡང་ན་བླ་མའི་དུས་མཆོད། ཡང་ན་རྟེན་གསུམ་བཞེངས་པ། ཡང་ན་དགེ་འདུན་གྱི་བསྙེན་བཀུར་མཛད་པ་ལས། རང་དོན་དུ་ཏིལ་འབྲུ་ཙམ་ཡང་མི་འཆང་བ་མངོན་སུམ་དུ་གྱུར་པ་འདི་ཉིད་དོ། །རྒྱུ་མཚན་དེ་དག་གི་ཕྱིར་ན། སྙན་པའི་གྲགས་པས་ས་སྟེང་ཐམས་ཅད་ཁྱབ་སྟེ། དགུང་ལོ་དོན་བརྒྱད་བཞེས་པ་ན་ཡང༌། ཨེ་ཝཾ་ཆོས་ལྡན་དང༌། ངམ་རིངས་དང༌། མངའ་རིས་གསུམ་ནས་གདན་འདྲེན་པ་ཅིག་ཅར་དུ་བྱུང་སྟེ། ཐམས་ཅད་ཀྱིས་མགྲིན་གཅིག་ཏུ་བདག་ཅག་རྣམས་ཀྱི་ས་ཕྱོགས་ཞབས་ཀྱིས་བཅགས་ནས། ཞལ་བསྟན་པ་ཙམ་ཞིག་མཛད་ན་ཡང༌། འགྲོ་བ་དཔག་ཏུ་མེད་པའི་དོན་དུ་འགྱུར་བ་ཡོད་དོ་ཞེས་ཞུས་སོ། །དེའི་ཚེ་རྒྱུད་སྡེ་འཛིན་པ་ཆེན་པོ་ཀུན་དགའ་དབང་ཕྱུག་པ། ཆོས་རྗེ་བཟང་པོའི་ཞབས་ཀྱི་བཀའ་བཞིན་དུ། ཨེ་ཝཾ་ཆོས་ལྡན་གྱི་གདན་སར་བསྐོས་ཏེ། བཤད་སྒྲུབ་རྒྱུན་མི་ཆད་པར་མཛད་དོ། །གཉིས་པ་བསོད་ནམས་སྤེལ་བའི་ཕྱིར། རྒྱུན་བཤགས་བྱ་བ་ལ་བདུན་ལས། ཕྱག་འཚལ་བའི་ཡན་ལག་ནི། སྲིད་ན་ཁྱོད་འདྲའི་ཞེས་སོགས་ཚིགས་བཅད་བཞི་སྟེ། དང་པོ་གཉིས་ཀྱིས་དཀོན་མཆོག་གི་སྒྲ་དོན། རྒྱུད་བླ་མ་ལས་དྲུག་གསུངས་པ་དང་སྦྱར། གསུམ་པས་རྒྱལ་གྱི་སྒྲ་དོན་ཡབ་ཡུམ་སྲས་གསུམ་དང་སྦྱར། བཞི་པས་མཚན་གྱི་སྒྲ་དོན་སྐུ་གསུང་ཐུགས་དང་སྦྱར་བའོ། །ཡན་ལག་ལྷག་མ་