[A:85]dregs pas blo gros mi 'khrugs pa'i/ /lta ngan rab rib kun nas sel mdzad cing / /mdo rgyud lung rigs snang bas kun gsal ba'i/ /blo gsal ku mud dpal de rtag par rgyal/ /rtogs pa brjod pa mdo tsam zhig bsnyad zin to// //da ni de lta bu nyid kyis rnam par phye ste rgyas par bsnyad na/ mtha' gcig tu nges pa'i mtshan ma bsgribs pa'i bdag nyid chen po 'di ni thun mong dang thun mong ma yin pa'i yon tan rgya mtsho'i pha rol tu phyin pa ste/ thog ma nyid du 'jig rten pa dang mthun pa'i yi ge dang / rtsis dang / rol mo'i bkod pa dang / zlos gar gyi rig byed dang / rgyal po dang blon po lugs kyi bstan bcos la sogs pa dang / nor bu brtag pa dang / skyes pa dang / bud med dang / dud 'gro brtag pa la sogs pa 'jig rten pa la nye bar mkho ba thams cad la 'bad pa med par mngon du mdzad pa yin no zhes khums shing deng sang gang gis mngon du gyur pa tsam gyis lta ba po'i mig dang yid mgu bar byed pa dang / 'di'i bsngags par 'os pa thos pa nyid na sgrib pa stug por gyur pa 'jil ba dang / gang gis gus pas brten pa de zad mi shes pa'i rin po che'i gling du phyin par byed pas na/ ma lus pa'i rgyal ba sras dang bcas pa'i yab tu gyur pa de'o zhes nges par bya'o/ /de ltar gyur pa des thog mar bshes gnyen dam pa ji snyed cig bsten cing gang las dri ma med pa'i rgyud dang mdo sde dang bstan bcos la sogs pa gang zhig gsan cing thugs su chud par mdzad pa dang / sgro 'dogs pa dang / skur pa'i mtha' gnyis po rnam par bsal te/ ji ltar gnas pa'i don mdo tsam zhig rtogs pa gang yin pa de 'dir brjod pa ni 'di lta ste/ de yang sdom brtson dam pa 'dis chos kyi rje khams gsum gyi rnam par 'dren pa thun mong ma yin par gyur pa rje btsun rin po che rgyal mtshan gyi zhabs la/ dri ma med pa'i rgyud sde chen po rnams rtsa ba dang bshad pa'i rgyud du bcas pa dang / de dag so so'i dgongs pa