[A:86]gsal bar byed pa'i rnam 'grel du ma dang / rgyud sde so so'i dgongs pa dang mthun pa'i dkyil 'khor gyi cho ga dang / de'i lha mnyes par byed pa so so'i sgrub pa'i thabs ma lus pa dang / zab mor gyur pa'i rgyud sde ma lus pa'i gces pa'i gnad/ dpal ldan chos skyong rnal 'byor gyi dbang phyug birWa pa la sogs pa dngos grub brnyes pa mtha' dag gis dgongs shing rjes su gdams pa dang bcas pa gsan cing mngon du mdzad pa legs par rtogs pa'i tshul dang / de nyid las mdo dang bstan bcos la sogs pa ji snyed cig nos pa de dag gsal bar brjod pa ni 'di lta ste/ de yang rnal 'byor gyi dbang phyug des rgyud sde zab mo rnams phyag tu blang ba'i rim pa bskyed pa rdul tshon gyi dkyil 'khor rang bzhin gyis grub pa dang bcas par dbang bzhi'i cho ga rdzogs par smin par mdzad nas/ rnal 'byor chen po gnyis su med pa'i rgyud dpal kye rdo rje'i bshad pa la/ rtsod pa'i dus su rgyud sde dang gdams ngag ma lus pa'i mdzod 'dzin pa bla ma chen po 'brog mi lo tsA ba shAkya ye shes nyid las dpal ldan sa skya pa chen po dge ba'i bshes gnyen 'khon dkon mchog rgyal po nyid kyis gsan pa dang / yang lo tsA ba chen po de nyid kyis dus phyis kyi thugs sras dam par gyur pa bla ma mnga' ris pa gsal ba'i snying po zhes bya ba'i bshad pa'i srol te/ gnyis ka rnal 'byor gyi dbang phyug chen po birWa pa'i dgongs pa/ jo bo ga ya dha ra'i gsung sgros lo tsA ba chen po de'i dgongs par gcig mod/ 'on kyang bla ma mnga' ris pa'i gsung gtso bor gyur pa/ rtsa ba'i rgyud brtag pa gnyis pa dang / de'i bshad pa'i rgyud thun mong ma yin pa rdo rje gur/ thun mong ba sampu Ta ste rgyud gsum du grags pa dang / yang o Dyan gyi paNDi ta rnal 'byor gyi dbang phyug dpal shes rab gsang ba zhes bya ba'i bshad pa'i srol/ brtag pa gnyis pa'i rgyud phyi mar gyur pa phyag rgya chen po thig le dang / bshad pa'i rgyud ye shes thig le/ de kho