[A:98]zad gsan pa ni/ rnal 'byor gyi rgyud la rdo rje snying po'i rgyan gyi rgyud dang / rdo rje sa 'og la sogs pa sngar bod du ma 'gyur zhing yongs su ma grags pa'i rgyud sde dang / de'i cha lag tu gyur pa mang du bsgyur zhing gsan la/ gzhan yang slob dpon Arya de bas mdzad pa'i dpal ldan gsang ba 'dus pa'i rlung las rnam par rgyal ba zhes bya ba gsan cing bsgyur/ de las gzhan sngags kyi man ngag phran bu 'ga' zhus shing thugs su chud par mdzad pa yin te/ nges par rtogs pa'i don la som nyi ga la yod/ de nas mkhas pa chen po de la gser dang dngul la sogs pa'i rin po che dang / gos chen dang dar la sogs pa na bza'i rigs mang po dang / gzhan zhabs 'bring ba la sogs pa rnam grangs du mas mnyes par mdzad nas/ slar yang sngar smos pa'i sdom brtson dam pa de'i thad du byon nas bdag nyid thog ma nas tshangs par spyod pa dri ma med pa'i rgyan gyis kun nas spras shing / bslab par bya ba ji snyed pa la rtsa ba dang yan lag gi nyes pa phra zhing phra bas ma reg pa yin du zin kyang / shAkya'i rgyal po de'i bka' drin mi 'dor bar dgongs nas sdom brtson dam pa de la gsol ba btab ste/ lo ston rdo rje dbang phyug gis bzhengs pa nyang smad rgyan gong zhes bya ba'i gtsug lag khang du/ rgya mtsho lta bu'i dge 'dun gyi dbus su bsnyen par rdzogs par mdzad nas/ de nyid kyi thad du yun ring du bzhugs shing rjes su 'brangs te/ sgra dang / tshad ma dang / dri ma med pa'i mdo sde dang / rgyud sde dang bstan bcos rin po che gang zhig gsan pa de gsal bar brjod par bya'o/ /de la thog mar sgra'i bstan bcos snying po btus pa'i stod cung zad cig gsan de nyid las tshad ma'i gzhung lugs mang du gsan pa ni 'di lta ste/ dpal ldan chos kyi grags pa'i gzhung lugs tshad ma rab tu byed pa sde bdun zhes grags pa las lus lta bu'i bstan bcos kyi gtso bor gyur pa tshad ma rnam par 'grel pa le'u gsum pa yid kyi shing rta dga' ba'i rjes su 'brang pa gsan/ yang lha