[A:83] phan pa dang bde ba'i phyir zhugs pa de bzhin du 'jig rten thams cad kyi don dang / phan pa dang / bde ba dang / grol ba dang / dbugs dbyung ba dang / yongs su mya ngan las 'da' ba'i phyir zhugs shing thams cad mkhyen pa nyid thob par bya ba dang / 'jig rten gyi chos thams cad yongs su rdzogs par bya ba'i phyir/ bla na med pa yang dag par rdzogs pa'i byang chub tu zhugs pa rgyal po chen po legs so zhes gsungs pa lta bu'o/ /de ni 'dir yongs su gsal bar gsungs pa bsnyad par bya ba ni 'di yin te/ dus gsum gyi rgyal ba thams cad kyi de bzhin nyid rnam par dag pa/ rtsod pa'i dus kyi skal ba dang mthun pa rnams la bcom ldan 'das 'jam pa'i dbyangs zhes bstan pa des nges par dgongs shing rjes su gdams la/ sgrub byed khyad par du mas de dang gnyis su med pa yin te/ bcom ldan 'das byams pas rig pa'i gnas lnga dang / de'i byed las gsungs pa de nges par bdag nyid chen po 'di la mnga' ba yin te/ de yang shes bya sgra'i gnas la/ sgra dang / byings dang / rnam par dbye ba dang / byed pa'i tshig dang / khyad par gyi chos la sogs pa'i sgo nas ming gi nges brjod gtso bor ston pa 'chi med mdzod dang / kA la pa dang / drang srong chen po pA Ni mchog 'gro'i gzhung la sogs pa legs par sbyar ba'i skad la dbang 'byor pas/ brtul zhugs grub pa chen po rgyas pa dang / gnas 'jog dang / grog mkhar ba dang / sgra sbyor ba phal chen po nor rgyas kyis kyang dper bya ba ma yin no/ /yang mngon sum dang rjes su dpag pa'i spyan ras shin tu gsal bas rtog ge ngan pa'i rab rib thams cad sel bar mdzad pas na/ mdo mdzad pa po dpal ldan phyogs kyi glang po dang / de'i gsung rab rnam par 'grel pa rtog ge pa rnams kyi gtsug rgyan de dang gnyis su med par grub cing / gzhal bya'i gnas rnam pa gsum la tshad ma gsum gyis grub pa'i lam