[A:84]ston pas phyi nang gi gzhung rnam par 'byed pa la/ rang dang gzhan gyi sde pa thams cad kyi spyan du gyur pa/ khyad par rig pa 'dzin pa'i gzhung lugs rten cing 'brel par 'byung ba rin po che'i 'byung khungs/ skye ba 'di nyid la rdo rje 'chang chen po'i gnas thob par byed pa'i bgrod pa gcig pa'i lam thun mong ma yin pa'i gter 'dzin pa/ rnal 'byor gyi dbang phyug ming gzhan dpal ldan chos skyong zhes grags pa dang / 'phags pa klu sgrub la sogs pa bstan bcos mdzad pa po byon zin pa rnams rmad du byung ba'i spyod yul dang ldan par grags pa de rnams kyi gsung rab dang dgongs pa la mnga' 'byor pa mngon du mdzad pa nyid dang / gso ba'i gnas la zin pa'i 'byung ba chen po'i 'phel ba dang 'grib pa'i chas kun nas bskyed pa'i lus dang sems kyi nad mtha' dag gso bar mdzad pa'i gzhung lugs phyi nang gi rgyud sde chen po gnyis dang / dpal ldan pha gol gyi gzhung rim par phye ba brgya nyi shu rtsa brgyad du bsdus te bstan pa la sogs pa thun mong ba/ slob dpon klu sgrub kyis mdzad pa'i lag tu blang ba'i rim pa mdo lnga dang dpyad gzhung bcu la sogs pa nyid kyis mngon du mdzad pa ni/ drang srong chen po rgyun shes kyi bu la sogs pa las ches lhag pa nyid dang / gzhan yang sdeb sbyor gyi gzhung lugs chen po gsum dang / dbyangs can gyi mgul rgyan stong phrag bcu gnyis pa la sogs pa ma lus pa mngon du mdzad pa dang / de las gzhan rgyu skar kyi rtsis dang / rgya mtsho'i dpyad dang / ri mo'i gnas dang / rol mo'i rig byed dang / zlos gar gyi sgo nas dus mtshungs pa'i blo gsal ba rnams kyi yid kun nas 'phrog pa'i don gyi rgya mtsho'i lha mo dbyangs can ltar gyur pa 'di ni kho bo'i ston pa yin te/ mdo sde drin lan bsab pa las/ de bas na bla na med pa'i byang chub thob par bya ba'i phyir rig pa'i dngos po lnga bslab par bya'o zhes gang gsungs pa 'di nyid kyis mngon par bsgrubs pa yin no/ /chags sdang