[A:131]po med/ stug par snang ba'i lo rgyus drung na zlo zhing snang ba dang / chos rje'i zhal nas sangs rgyas dang byang chub sems dpa' thams cad kyang mkhyen bzhin du thugs rjes mi gzigs pa gsungs/ de'i nub mo tho rangs bla ma rje btsun pa dang / slob dpon birWa pa dang / nag po pa gsum byon nas khyod de la yid ma chad/ zag bcas kyi lus 'di la skye rga na 'chi'i chu bo bzhi yod pa yin gsungs/ birWa pas 'dzum pa mdzad/ nag po pas de yin gsungs/ birWa pas thod pa'i bdud rtsi la srin lag gis reg nas khyod kyis ljags rkyongs gsungs nas ljags la thig le byas pa'i snang ba byung gsungs/ de'i dus su rtog pa dang rtog med mtha' las 'das pa bde gsal mi rtog pa rgyal ba rnams kyi thugs rgyud la yang 'di las lhag pa med snyam pa'i snang ba byung / de nas bla ma rje btsun pas 'di nas gzhan don la 'gro ba'i dus su shar phyogs kyi 'jig rten gyi khams du ma brgal ba'i pha rol tu mkha' la gnas pa'i rig pa 'dzin par gyur nas de bzhin gshegs pa du ma mnyes par byas shing / sangs rgyas kyi zhing yongs su dag pa dang / sems can du ma yongs su smin par byas nas sa dang lam phal cher bgrod de/ skye ba gsum pa la dzambu'i gling 'di nyid kyi rgya gar shar lho mu mu ni zhes bya bar rgyal po nyi ma'i stobs 'phel zhes bya ba'i bur 'khrungs nas/ gzhon nu la rtsom pa dang 'chad pa mang po mdzad/ mngon par shes pas 'jig rten thams cad la gzigs te/ 'khor dad ldan 'bum phrag du ma grol bar byas nas/ de'i dus su ngas dbang bskur ba dang / chos 'brel byas pa tsam thams cad nga'i 'khor du 'ong bar 'dug gsungs pa'i tshig kyang yod/ sku tshe'i tshad kyang yod pa brjed zin/ de nas sku tshe 'phos nas/ sangs rgyas dri ma med pa'i dpal zhes bya bar sku skye ba bzhes nas sems can gyi don mdzad par 'dug gsungs/ rje btsun pas birWa pa dang nag po pa la de ltar lags sam gsungs/