[A:115]duu sa skya'i ltag gi a phyi'i mchod rten de'i drung du slob dpon dbyig gnyen las mdzod gsan te/ de yang nub gcig la zla ba gcig gi snang ba byung / slob dpon mchod rten gyi drung nas zhal shar du gzigs te gsungs/ slob dpon de yang sku mdog bag gis sngo ba/ cha lugs sku nyams la sogs pa sgeg drags pa yang ma yin pa/ dar yol ba cig tu snang / dus snga dro'i tshe na chos thun sum cu la rdzogs par gsungs/ chos rje slob dpon gyi g.yas nas zhal byang du gzigs te/ dpe bkram nas gsan pa rmis te mnal sad pa dang tshig dang don kun thugs la byung 'dug gsung / phyis bla ma paN chen las dngos su gsan pa dang mthun par byung gsung ngo / /yang nub gcig gi rmi lam na mi cig na re phyogs kyi glang po'i gdan sa gtong pas 'byon par zhu zer nas rgya gar shar phyogs su phyogs glang gi phug pa yin zer ba'i sgo shar du bltas pa cig tu byon/ sgo phye ste nang du byon pa dang / phyogs cig na bka' pod mang po 'dug pa gzigs nas de dag zhal dbye bar byas pa'i tshe/ mi cig gis na bza'i sna nas phyir la then phyed pa snyam byung bas mnal sad de dpe gzigs long ma byung / de ni da lta'i g.yeng ba mang po dang / mtha' mi la sogs pas nyan bshad kyi bar chad cung zad byed pa 'di la lta ba 'dra gsungs/ de'i rjes la tshad ma la rtogs pa khyad par can skyes gsung / de nas dgung lo bcu dgu pa'i dus su 'phrang du dge bshes zhu hrul las byams chos dang tshad ma'ang bag tsam gsan/ dgung lo nyi shu pa'i dus su nyang stod rkyang 'dul du dge bshes mtshur gzhon nu seng ge'i drung du tshad ma gsan du byon pas/ nyams khrid tshar gcig la tshig don ma lus pa thugs la byon nas bshad par zhus pas/ khong rang gi blo'i rgyab bkab nas mgo ma thon gyi dogs nas da rung nyon gsung / rnam nges stod tshar bzhi/