[A:63a]gso sbyong la gnas pa'i glo g.yas bar / glang po che'i rnam pas lhums su zhugs te / gser gyi dra bas [B:57a]legs g.yogs spyi gtsug dmar / /
thal kar mche ba drug dang rab ldan zhing / /
dung dang kha ba dngul mdog lta bu yi / /
glang po'i mchog cig khong du song snyam byed / /
de zhugs nas ni bdag gi lus dang sems / /
sngon chad mthong thos myong bar ma gyur pa'i / /
gya nom bde bas shin tu bder gyur te / /
bsam gtan [C:85]mnyam par bzhag pa bzhin du gyur / /
ces so / /
rmi ltas de bram ze rnams la dris pas / sras khyad par can zhig 'byung ste / khab tu bzhugs na 'khor los sgyur rgyal dang / rab tu byung na sangs rgyas su 'gyur bar lung bstan no / /
de nas yum gyi lhums rgyal sras kyi nye bar spyad pa rin po che bkod pa zhes par byin gyis brlabs nas / zla ba bcur zag med kyi bde ba la longs spyad nas / lha dang mi'i skye dgu khrag khrig phrag sum cu rtsa drug smin par byas so / /
de nas me tog kha 'bus shing rgyas par gyur pa la sogs pa ltas sum cu rtsa gnyis byung ba dang / lu ma pa ni'i tshal du yum gyi phyag shing plakSHa la 'jus te / yum gyi glo g.yas pa nas yum la gnod pa med par na bza' dang bcas nas bltams pa na / lhas me tog gtor / tshangs pa dang brgya byin gyis ka shi ka'i ras kyis blangs / dga' bo nyer dga' gnyis kyis sku khrus gsol ba dang / kau shi ka nga thong gsung ste / shar du dge ba'i chos thams cad kyi sngon du 'gro bar bya'o / /
lhor lha mi rnams kyi sbyin gnas [B:57b]su 'gyur bar bya'o / /
nub tu nga ni 'jig rten 'di na phul du phyin pa'o / /