[A:67a]bar / sgyu rtsal thams cad la byang chub sems dpa' lhag par gyur pa dang / be con can gyis bu mo phul lo / /
byang chub sems dpas kyang 'jig rten dang mthun par bya ba'i phyir / bud med brgyad khri bzhi stong gi mchog tu sa 'tsho ma dbang bskur te / de dag dang rtse dga' la longs su spyod do / /
de nas lha klu kha cig ma la skyes bu dam pa 'di btsun mo'i 'khor du yun ring du bzhugs na / snod du gyur pa'i sems can rnams med par 'gyur zhing / de nas mngon par 'byung bar mi 'gyur grang snyam zhing / gus pa dang bcas pas mngon par 'byung zhing sangs rgyas nas chos gsung snyam zhing 'dug go /
sangs rgyas bcom ldan 'das rnams kyis kyang sil snyan gyi sgra las skul ba'i tshigs su bcad pa / sdug bsngal rgyas gang sems can mthong nas ni / /
'gro ba'i mgon dang skyabs dang gnas gyur cing / /
phan byed mgon dang dpung gnyen gyur cig ces / /
khyod kyis sngon ni smon lam de skad btab / /
dge ba dpa' bo sngon gyi spyod pa dang / /
'gro phan bya zhes smon lam dran par byos / /
'di ni khyod kyi dus dang tshod yin gyis / /
drang srong mchog rab khyim nas 'byung bar byos / zhes sogs kyis bskul zhing / btsun mo rnams kyis rol mo'i sgra las kyang / sngon gyi skyes rabs dag gleng te / srid gsum rga dang nad kyis sdug bsngal 'bar / /
'chi me rab 'bar 'di ni mgon [B:61a]med pa / /
srid las 'byung la 'gro ba rtag tu rmongs / /
bum par chud pa'i bung ba 'khor ba bzhin / /
srid gsum mi rtag ston ka'i sprin dmag 'dra / /
'gro ba'i skye 'chi gar la blta dang mtshungs / /
'gro ba'i tshe srog nam mkha'i glog 'dra ste / /