[A:80b]kyi 'khor lo mgon pos bskor / /
zhes pas so zer ro / /
paNDi ta gzhan phan bzang po na re / rigs med pa la mngon mtho'i 'khor lo bskor gsung ngo / /
sad dza na na re / rang sangs rgyas kyi rigs can la rang rgyal gyi chos kyi 'khor lo bskor gsung ba la / chag na re / 'khor lo gsum du bshad pa dang 'gal zhing / de lta bu'i sde snod logs pa mi snang bas gsal zer ro / /
de ltar bde bar gshegs pas ngag kun nas slong ba'i bag chags spangs pas / ngag gis ston pa med pas sangs rgyas nas / mya ngan las ma 'das bar du yi ge gcig kyang / ma gsungs kyang sems can gyi bsam pa'i dbang gis sna tshogs su ston te / 'phrul 'khor las byas sil snyan ni / /
rlung gis bskyod pas sgra 'byin cing / /
de la brdung ba 'ga' med mod / /
de lta na yang sgra 'byung ltar / /
de bzhin sngon legs sbyangs pa'i phyir / /
sems can rnams kyi bsam pa yis / /
bskul bas sangs rgyas gsung 'byung ngo / /
de la 'dir rtog yong mi mnga' / /
zhes gsang ba bsam gyis mi khyab pa las 'byung ngo / /
de ltar ston pas / sems can ma rig pa'i ling tog gis ni g.yogs / bdag lta'i mdud pas ni bcings / nga rgyal gyi ri bos ni non / 'dod chags kyi mes ni gdungs / zhe sdang gi mtshon gyis [C:108]ni rmas / 'khor ba'i dgon par ni zhugs / skye rga na 'chi'i chu bo las ma brgal te / sdug bsngal bar gzigs nas / de las thar bar bya ba'i phyir dpal gyi mgur dung gi tshems bar nas / 'phrul gyi ljags brkyangs te / tshangs pa'i gsung phyung ste chos kyi 'khor lo ma lus par bskor ro / /
de nas mya ngan las 'das pa'i mdzad pa ni / bcom ldan 'das kyis