[A:83a]pa chos gsungs pa / mya ngan las 'das pa'i phyogs bzhi bstan par bya'o / /
dge slong dag / dkon mchog gsum dang bden pa bzhi la the tshom yod na zhus shig /
de nas sku'i stod g.yogs bsal te / dge slong dag /
de bzhin gshegs pa lta ba ni rnyed par dka' yis / de bzhin gshegs pa'i sku la ltos shig /
dge slong dag /
re zhig cang ma smra zhig dang / 'di ltar 'dus byas thams cad ni 'jig pa'i chos can yin te / de la 'di ni de bzhin gshegs pa'i gsung gi tha ma yin no zhes gsungs nas / bsam gtan bzhi / gzugs med bzhi / 'gog snyoms la / lugs 'byung lugs zlog la snyoms par zhugs nas / slar bsam gtan bzhi la zhugs te / rab mtha' las mya ngan las 'das so / /
slob dpon tshul khrims bskyangs kyis / phran tshegs 'grel pa las / kha che ba dang bstun nas / rab mtha'i rjes la lung ma bstan gyi / sems las mya ngan las 'das pa yin yang / rab mtha' dang nye bas rab mtha' zhes brjod [C:111]par bshad do / /
de ma thag /
sa g.yos / skar mda' lhung / phyogs tshig /
lha'i rol mo'i sgra grag go /
de'i tshe 'od srungs chen po rgyal po rgyal pa'i khab na gnas pas / ston pa 'das par shes te / 'dus [B:75a]byas kyi chos nyid 'di 'dra'o snyam ste / de ma skyes dgras thos na 'chi bar 'gyur bas / de'i thabs shig bya'o snyam ste / bram ze dbyar byed la / khyod myur du skyed tshal du song la / ston pa lhums su zhugs pa dang / sangs rgyas pa dang / 'khor lo bskor ba dang / mnyan yod du cho 'phrul bstan pa dang / grong