[A:86a]grong khyer rtswa can brten nas mya ngan 'das / zhes gsungs so / /
de la mya ngan las 'das pa'i don ni nyan thos ltar na bud shing zad pa'i me bzhin du / bem rig thams cad gtan rgyun chad nas / mya ngan las 'das par 'dod do / /
theg chen pa kha cig longs spyod rdzogs pa'i sku ni mya ngan las 'da' kyang 'khor sus kyang 'das par mi shes te / dper na brgya byin ni gcig shi nas gcig skyes kyang / 'khor gyi lhas mi shes pa bzhin no / /
zer te / de ni mi 'thad de / longs sku rgyun mi chad pa'i rtag par gsungs pa'i phyir ro / /
tshe ring ba'i rgyu gnyis te / srog gcod pa spangs pa dang / gzhan la zas byin pa'o / /
zhes gsungs shing de gnyis mthar phyin pa'i tshogs gnyis bsags pa'i phyir dang / rdzu 'phrul gyi rkang pa bzhi la brten bsgoms mang du byas na / 'dod na bskal pa'am bskal pa las lhag par yang gnas so / /
zhes gsungs pa'i phyir ro / /
sgo mtha' yas pa bsgrub pa'i [B:77b]gzungs kyi 'grel par / sprul pa'i sku ni mya ngan las 'da' barbrjod kyi cig shos min / /
gtan du gnas pa'i rgyu ldan pa / /
mya ngan 'da' bar yang mi rigs / zhes so / /
des na sprul pa'i sku mya ngan las 'da' ba'i tshul ston gyi / longs sku ni ma yin no / /
sprul sku yang mya ngan las 'da' ba'i tshul ston gyi / gtan rgyun chad pa ma yin te / dam chos pad dkar du / sman pa mkhas pa'i bu sman mi 'thung ba la / sman sbyar nas yod pas 'thungs shig / nga ni 'chi'o zhes 'chi bar bcos / bu des kyang / pha sman pa ni shi / gzhan sman shes pa ni med pas / 'tsho ba'i phyir sman 'thung ngo / /
de