[A:115b]lce la gi hang gi yi ge a 'dri ba la sogs pa blo rno ba'i cho ga yang byas te / cher skyes pa'i tshe / pha'i las gang yin zhus pas / ma na re / khyed de'i phyir ma bskyed kyis / blo sbyong gyis la bstan pa dar bar gyis shig gsung nas / gcung [C:153]kha cher slob dpon 'dus bzang gi drung du byon / gcen gyis byams pa bsgrubs la bstan pa dar bar bya'o snyam ste / ri bya rkang gi phug tu bsgrub tu byon te / lo gsum du bsgrubs pas mtshan ma cung zad kyang ma mthong bas skyo ste / phyir thon pa na rgan po shing bal gyi [B:104a]'dab mas lcags kyi sdong po la khab byed pa mthong nas / khab ji ltar 'byung zhes dris pas / snying stobs ldan pa'i skyes bu yis / bsgrubs na mi 'grub gang yang med / /
dka' yang brnag pa ma dor na / /
ri bo rnams kyang thal bar rlog /
zer bas / lo drug dang dgur bsgrubs te thon pa na chu thigs kyis kyang brag zad pa dang / bya sgros brag zad par mthong ste / lo bcu gnyis su bsgrubs kyang mtshan ma ma byung bas skyo ste / phyin pa na / khyi mo ro smad 'bus gzhigs pa / ro stod zugs zhing za ba zhig mthong nas snying rje lhag par skyes te / bsal na 'bu 'chi / ma bsal na khyi mo 'chi bar snang bas / rang gi lus las sha bcad de / der 'bu bsal snyam ste / grong khyer a tsen ta zhes bya bar phyin te / gseg shang gteng bar bcug nas / gser gyi spu gri g.yar te / rang gi lus sha bcad / lag pas blangs na shi yis dogs te / spyan btsums ste / ljags kyis blang snyam pa dang / khyi med par rje btsun 'od dang bcas pa mthong nas / kye ma yab cig bdag gi skyabs / /
ngal brgyas 'bad kyang 'bras ma mchis / /
ci phyir char sprin rgya mtsho'i dpung / /
gdung bas bsregs te skom tshad 'bab / /