[A:116a]bdag gis de tsam bsgrubs kyang rtags kyang ma byung na / thugs rje re chung zhes 'khangs pas / rje btsun gyis / lha yi rgyal pos char phab kyang / /
sa bon mi rung mi 'khrung ltar / /
sangs rgyas rnams ni byon gyur kyang / /
skal ba med pas bzang mi myong / /
nga dang po nas yod de / khyod rang gi sgrib pas ma mthong la / da lta snying rje chen po skyes pas dag nas mthong ba yin te / de ltar yin par / khyod rang nga phrag gong du khur la ston cig gsung nas bstan pas / mthong ba ma byung bas / der yid ches so / /
khyod ci 'dod gsung ba la theg chen dar bar zhu 'tshal byas pas / nga'i chos gos [B:104b]la 'jus shig gsung nas / dga' ldan du byon te lha'i gro skad gcig /
mi lo lnga bcu'am / lnga bcu rtsa gsum du bzhugs par 'chad / sa sde'i sna mchan las / zla ba drug bzhugs te gsan zhes 'byang ngo / /
der yum gyi mdo rnams dang / rnal 'byor spyod pa'i sa chen po dang / theg chen gyi mdo sde mang du gsan no / /
de dag gi don ston pa'i bstan bcos rtsom par zhus pas byams chos lnga brtsams so / /
zhes slob dpon seng bzang la sogs pa 'dod la / gnad kyi zla zer las / bka' bsdus pa'i rjes la dus der gnas pa nyid nas mchog tu zab cing rtogs par dka' la rtogs par mi nus pas / thugs rje de [C:154]rtogs pa'i don du 'phags pa byams pas mngon par rtogs pa'i rgyan gyi tshig le'ur byas pa'i bstan bcos kyis gsal bar mdzad kyi / 'phags pa thogs med kyis zhus nas dus phyis byas zer ba ni / seng ge bzang po la sogs pa rnams kyi 'khrul pa ste sngon du byas pa las bshad ces pa ni / gzhan dag gi'o zhes gsungs so / /
slob dpon