[A:120b]mkhan po la zhus nas / mkhan pos khyod ci'i phyir de ltar byed dris pas bdag tshol lo zhes so / /
khyod rang gi grub mtha' sun 'byin par 'dug pas song zhig zer ba dang / mkhan po de nyid du rigs pas sun dbyung nus mod kyi / 'os ma yin no snyam ste rim gyis byon te slob dpon dbyig gnyen can byon te / theg pa gsum la mkhas par sbyangs shing / khyad par rnam rig pa'i grub mtha' dang tshad ma la mkhas par gyur to / /
de nas slob dpon gyis [B:108b]'gro ba rnams kyi sdug bsngal gyi rgyu yang dag pa'i don ma rig pa yin pas / de spang ba'i phyir dang / gnyen po shes rab bskyed pa'i phyir mdzod kyi 'grel pa dang / yon tan mtha' yas par bstod pa'i 'grel pa dang / dmigs pa brtag pa la sogs pa bstan bcos thor bu ba brgya rtsa brtsams so / /
de dag kyang 'thor ba lta bur gyur pas / gcig tu bsdus pa tshad ma'i mdo kun las btus pa brtsam mo zhes dgongs te / phyogs kyi glang po'i phug ces pa'i brag ngos la rdo thal gyis / tshad mar gyur pa 'gro la phan bzhed pa / /
ston pa bde gshegs skyob la phyag 'tshal te / /
tshad ma bsgrub phyir rang gi gzhung kun las / /
btus te sna tshogs 'thor rnams 'dir gcig bya / zhes mchod brjod dang bshad par dam bca' bris pa tsam gyis / sa g.yos / 'od gsal / sgra chen po grag /
mu stegs kyi ston pa rnams byin pa shing bzhin rengs pa la sogs pa ltas khyad par can du ma byung / de'i tshe nye logs na mu stegs kyi ston pa nag po thub rgyal zhes bya ba zhig yod pas / mngon shes phra mos bltas pas de'i mthur shes te / phrag dog gi dbang gis / slob dpon bsod snyoms la bzhud pa'i shul du phyin te / lan gnyis su bsubs pa