[A:131a]rnam par rgyal ba'i gnas na yod / 'bring 'bum phrag brgya ba lha'i dbang po'i gnas na yod / bsdus pa 'bum klu'i yul na tshang bar bzhugs / gsang sngags la'ang ye shes rdo rje kun las btus su bya ba'i rgyud stong phrag bzhi / spyod pa'i rgyud stong phrag brgyad / rtog pa'i rgyud stong phrag bzhi / gnyis ka'i rgyud stong phrag drug / rnal 'byor chen po'i rgyud stong phrag bcu gnyis / rnal 'byor chen po bla na med pa'i rgyud stong phrag bcu bzhi gsung par bshad cing / rgyud re re la'ang rtsa rgyud bshad rgyud la sogs mang po yod pa las / 'dar byed kyi gling na kye rdo rje 'bum phrag lnga pa dang / gsang ba 'dus pa stong phrag nyi shu rtsa lnga pa dang / bde mchog mngon par brjod pa chen po'i le'u 'bum dang / rgyud phyi ma shu lo ka 'bum pa dang / dus kyi 'khor lo stong phrag bcu gnyis pa dang / rnal 'byor rjes su rig pa sum khri drug stong pa dang / sgyu 'phrul dra ba stong phrag bcu drug pa dang / ma h'a m'a y'a stong phrag bco brgyad pa dang / gshin rje'i gshed dmar po'i rgyud chen po 'bum phrag gsum pa dang / sgrol ma mngon par 'byung ba'i rgyud le'u bdun brgya pa dang / rta mgrin gyi rtog pa bdun brgya pa dang / don yod zhags pa'i rgyud 'bum phrag bdun pa la sogs pa rnams lha'i gnas dang / shaMbha la dang / u ryan la sogs pa na bzhugs zhes grag go /
gzhan yang / rgya gar dang / kha che dang / bal yul dang / li dang / rgya nag dang / rgya nag chen po dang / par sig dang / tsam pa ka dang / spre'u dang / gser mig dang / rug ma dang / ram ma dang / zangs gling dang / siM ga