[A:136a]steng du yang 'og min gyi bar du 'phags nas / me tog sna tshogs kyi char 'bebs la / me tog gi char de dag las dkon mchog gsum gyi sgra la sogs pa chos kyi sgra sna tshogs 'byung zhing / chos kyi sgra de rnams 'dod gzugs kyi lha rnams kyis thos pas sngon byas pa'i dge ba dran nas [B:122a]de dag 'dzam bu'i gling du babs te / mi rnams dge ba bcu la 'god par 'gyur ba dang / yang me tog nam mkha' la rin po che sna tshogs su gyur nas / mi mjed du 'bab cing / mi mjed kyi sems can rnams kyi 'thab rtsod la sogs pa rnams zhi zhing nad med pa dang lo legs pa la sogs pa dang / sems can gang gis rin po che de dag mthong ba dang / reg pa dang longs spyod pa de dag kyang / theg pa gsum las phyir mi ldog par byas te / slar yang sku gdung de dag gser gyi sa gzhi'i mthar thug par gnas par 'gyur ro / /
de bzhin du mtshon dang mu ge dang bskal pa bar ma gsum 'byung ba'i dus su'ang sku gdung de dag nor bu rin po che indri rnyil du gyur nas / steng du 'og min gyi bar du 'phags nas gnas te / snga ma ltar me tog gi char 'bebs shing / chos kyi sgra sgrogs pa dang / rin po che'i char 'bebs pa dang / mi mthun pa'i phyogs rnams zhi bar byas te / slar yang gser gyi sa gzhi'i mthar thug par gnas par 'gyur bar gsungs la / dge ba'i bshes gnyen gyi rtogs brjod las / 'dzam bu'i gling pa'i mi rnams kyi tshe [C:179]lo bdun brgya par gyur pa na / gnas brtan chen po bcu drug gis sa'i steng na / sangs rgyas sh'akya thub pa'i bstan pa'i chos kyi tshogs ji snyed bzhugs pa thams cad gcig tu