[A:33b]yi ge 'bru ma 'brel ba'i chos smra ba la tshul khrims dang rigs dang byad gzugs dang tshig 'byin pa ma tshang ba la sogs pa'i skyon yid la byed pa'i phyir brnyas pa'i skyon dang / smod pa'i skyon dang / rnyed pa dang bkur sti 'dod pa'i skyon dang / sems rnam par g.yengs pa dang gnyid rmugs kyis bsdus pas mi nyan pa'i skyon dang / dgongs pa dang chos nyid la phyin ci log tu rtog pas legs par yid la mi byed pa'i skyon dang / 'dun pa dang 'jug pa zhan pa nyid kyis rab tu yid la mi byed pa'i skyon no / /
IIICaa1a2b3. gnyis pa ni / rnam bshad rigs par / nga rgyal dang ni ma dad dang / /
don du gnyer ba med nyid dang / /
phyi rol rnam g.yeng nang bsdus dang / /
skyo ba nyan pa'i dri ma yin / /
zhes pa ltar ram / yang na las kyi skyon dang / mos pa med pa'i skyon dang / mchod par mi 'gyur ba'i skyon dang / bsam pa'i skyon dang / mi mthun pa'i skyon dang / 'dzin pa'i skyon no / /
las kyi skyon la / lus kyi las spyod lam mi sdug pa dang / lus ngag gnyis ka'i las de gnyis kyis skul bar mi byed pa dang / yid kyi las nyan par mi 'dod pa'o / /
bsam pa'i skyon ni gzhan la klan ka btsal ba dang / 'di lta bu zhig tu rgol ba las thar par bya ba'i bsam pa'o / /
mi mthun pa'i skyon lnga ste / chos la nges 'byin gyi lam min par go nas mi gus pa dang / tshig dang yi ge ma 'brel bas bsnyad pa dang / gang zag dang / tshul khrims dang / tshig 'byin pa'i skyon gyis gus pa med pa dang / rigs kyi skyon gyis brnyas pa'o / /
khong du chud pa dang sgrub pa'i nus pa mi 'byung snyam pa bdag la brnyas pa'o / /
'dzin pa'i skyon lnga ste / log par 'dzin pa dang / don mi 'dzin pa dang /