[A:34a]tshig 'bru mi 'dzin pa dang / brda ma phrad par 'dzin pa dang / ma lus par mi 'dzin pa'o / /
IIICaa1a2c3. gsum pa la / dper na char bab kyang chu'i bya ba mi byed pa'i [B:30b]snod kyi skyon gsum 'byung ste / kha bub bam bcad pas mi 'bab pa dang / mi gtsang bas bab kyang skyon can du 'gyur ba dang / bu ga dang bcas pas bab kyang mi gnas pa'o / /
de bzhin du chos kyi char bab kyang chos kyi chu'i bya ba mi byed pa'i skyon gsum ste / rnam g.yeng dang gnyid rmugs kyis mi nyan pas mi 'bab pa dang / tshul bzhin yid la mi byed pas bab kyang skyon can du 'gyur ba dang / dran pa brjed nges pa'i phyir mi gnas pa'o / /
de'i gnyen por / bcom ldan 'das kyis legs par rab tu nyon la yid la zung [C:45]zhig dang / zhes gsungs so / /
gzhan yang nad pa sman pa'i lung ma shes pa dang / log par shes pa dang / legs par shes kyang sman chud gsan pa dang 'dra ba dang / nad pa zas mi za ba dang / mi 'phrod pa za ba dang / 'phrod pa zos pa skyug pa gsum rim pa bzhin no / /
des na 'chad pa po snod la mkhas pas nyan pa rnam par g.yengs na / mi rnams tshe ni lo brgya la / /
mtshan mo nyal bas phyed du byas / /
de ni nyin par yang nyal bas / /
de yi phyed kyang dum bur byas / /
zhes pa la sogs pa skyo ba'i gtam bya / gnyid rmugs can la sems gsal bar bya ba'i phyir ya mtshan gyi gtam dang / bong bu dang rte'u 'am / seng ge dang wa'am / rgan zhugs dang bud med dam / rgan mo dang rkun mo dang / lus skyes ngus pa'i gtam rgyud bshad la / dga' ba'i gtam bya'o / /
IIICaa1b2. gnyis pa ni / bzhi brgya pa las / gzur gnas