[A:4]
dpal ldan jo nang pa'i rang lugs byung tshul spyir bshad pa |
de la 'dir 'o skol gyi rnam 'dren bzhi pa gang gis ring mo'i dus nas 'gro ba mtha' dag sdug bsngal las bsgral ba'i khur chen po nye bar lhur blangs te | rlabs po che'i thugs bskyed rgya che ba'i phul byung ya mtshan pa'i dam bca' kun mthar legs par phyin te | bla med byang chub kyi go 'phang bdag gir bzhes nas | nges pa lnga ldan gyi zhing gi gtso bo longs spyod rdzogs pa'i sgyu 'phrul gyi bkod pa chen po | rab 'byams 'jig rten gyi khams nam mkha'i mtha'i klas pa kun tu cig char ba'i gang 'dul gyi mdzad pa mtha' yas pa las mi mjed rten 'dir mchog gi sprul sku'i mdzad pa la rol te | rgya gar 'phags yul du mnyam med shAkya'i rgyal po zas gtsang gi sras su 'khrungs te | gdul bya thun mong gi ngor | srid pa tha ma pa'i byang sems tshogs lam chen po pa'i tshul gyis thog mar rgyal srid bskyangs | de nas rab tu byung zhing dka' ba spyad te | mthar srod la bdud btul | gung la mnyam par bzhag pas sbyor lam drod nas mi slob lam gyi bar mtshan mo gcig gis bskrod nas tho rengs rgyal rnga brdung ba'i skabs su | rang stobs kyis | zad mi skye mkhyen pa'i ye shes mngon du byas te bla na med pa'i byang chub chen po la dbang ba'i tshul gyis | gdul bya rigs can gsum rim gyis bstan pa la nye bar gzhug pa'i ched du bka' 'khor lo rim pa gsum legs par bskor ba ste | de las 'khor lo tha ma'i rjes 'brang gi dbu ma pa bod du byung ba dpal ldan nags rgyal gyi sgrub gnas su chos sde btabs pa las byung ba'i nges don sgrub brgyud kyi bstan pa 'dzin pa'i sde gang dag ni | dpal ldan jo nang pa ste bod 'dir phyag rdzogs dbu gsum du grags pa las dbu ma pa la rang stong gzhan stong gnyis su yod pa'i nang gi phyi ma nyid do | |