[A:133] bag chags yod shes che bas khams phyogs su 'gro don mi 'ong ba'i tshul gsal po zhib rgyas su mdzad kyang | khams phyogs nas 'ong ba de dag gis sku skyes yin nges la blo gtad byas nas re shing sku skyes nyid blus nas jo nang du khri ston mdzad de rje btsun las shin brjod me tog 'thor ba bcas dang sku skyes gzhon nu chos grwa la legs 'jug mdzad pa'i bka' drin kyang zhus | rje btsun khong nas de lugs ltar gyi so thar bsnyen rdzogs bcas kyi sdom pa dang rang lugs kyi zab bka' dus 'khor dbang yongs rdzogs sbyor drug myong khrid | naigu'i chos bka' cha tshang | thams cad rigs pa'i dbang lung | blo sbyong khrid lung bcas sogs nyer mkho'i zab bka' du ma legs gnang mdzad | byin rten khyad 'phags sogs legs skyes yang gzab ldan bcas mdzad sgo rgya che bas sku skyes dpon slob khams phyogs su nges don bstan pa'i bdag por mnga' gsol mdzad de kho tsho'i re ba bskangs | 'di dus su rtag brtan dam chos gling gsar 'debs kyi skabs dang rje btsun yang dgung grangs bzhi bcu lhag tsam yin |
de nas re shing sku skyes 'khor bcas khams phyogs su chibs kha bsgyur te chas pa na bod kyi srid gtsang stod rgyal pos bzung skabs yin zhing | zhang shag pa'i spung sde kun spangs drung dang | zhag shag pa rang gi bu chung ba | sde srid phun tshogs rnam rgyal | 'bring ba mthu stobs rnam rgyal | che ba karma bstan bsrung rnams yin zhing | de las sde srid phun tshogs rnam rgyal gyis bod ljongs kyi chab srid yongs rdzogs la mnga' dbang bsgyur te rje btsun rin po che'i bstan pa'i sbyin bdag che ba mdzad skabs yin pas 'di skabs sde sris nyid rgyal sa pho brang bsam 'grub rtser bzhugs pa'i dus der rgyal ba seng ge'i sku skyes dpon slob chibs bsu dang gdan 'dren bcas kyis chos bka' ci rigs zhus shing 'bul ba gzab ldan dang mdo khams chos kyi rgyal po'i 'ja' sa bka' yig sogs kyi gnang sbyin kyang mdzad |
de nas dgung lo nyer brgyad steng rim par gtsang bkra shis lhun po dang | thub bstan gser mdog can dang | lha sa ra mo che sogs la rim pas mjal zhing khams phyogs su phebs chas mdzad pa na 'bri gung du thon tsam la sku skyes bsnyung bas tshur log ste skyid shod brag dkar du gzugs sku'i me tog 'phral du yal lo | | de nas sku 'khor dag gis dgongs rdzogs kyang legs sgrub mdzad cing | 'di dus tsam na sa skya'i sngags 'chang 'jam dbyangs tshe brtan bkra shis | de'i sras kun dga' rin chen | 'dzam gling sgar ba rgyal dbang karma zhwa nag bcu pa chos dbyings rdo rje'i sku tshe'i stod tsam dang | zhwa dmar drug pa chos kyi dbang phyug dang | dge lugs phyogs paN chen chos kyi rgyal mtshan sogs kyi sku dus dang | 'bras spungs sku yon tan rgya mtsho 'das rjes tsam dang | sa skya'i rtse gdung bdag chen dang | stag lung mahA rin po che ngag dbang rnam rgyal sogs kyi dus dang | gnam skos gong ma tA ming wan lis khri bzung ba'i mjug tsam mngon no | |